Fury-a'n lo kir a duh

World heavyweight champion hlui Tyson Fury chuan damdawi hman phal loh a hman avanga hrem a nihna chu hlihsak thuai turin a ngen a, boxing ring chhungah inlan a chak tawh.

Kum 29 mi Fury hian November 2015-a Wladimir Klitschko a hneh hnuah tumah a la hmachhawn leh lo a, UK Anti-Doping-in a chungchang thu an ngaihtuah leh hma chu boxing a khel thei lo. Mahse UKAD hian Fury chungchang an ngaihtuah tur chu May thla khan an lo ṭhulh tawh a, July thlaa inhnek tum Fury-a'n glove a la bun theih loh phah.

Fury chuan, "Engtia rei nge hetianga dan beh ka nih a, inhnek hmachhawn thei lo tura dah ka nih dawn? Ka hming hi thaibo ula, ka ropuina hmunah ka let leh min phal sak rawh u. Eng pawi mah ka khawih lo a, min chhuah zalen rawh u," tiin twitter lamah a ziak.

UKAD hian June 2016 khan Fury hi damdawi hman phal loh a hmang tiin an hrem a, a thubuai an ngaihtuah hun tur an sawn hnuah ngaihtuah leh hun tur an la ruat lo.

Fury zinkawng
29 November 2015 : Ukrainian boxer Wladimir Klitschko a hneh a, WBA, IBF leh WBO champion a ni.
8 December 2015 : IBF lamin hmachhawn tura an tih chu a hmachhawn duh loh avangin IBF title hlih sak a ni.
24 June 2016 : A ngalrekah hliam a tawrh avangin Klitschko nena an inhnek tur chu sawn hlat a ni.
4 August 2016 : UK anti-doping agency chuan Fury-a'n damdawi hman phal loh a hman thu an sawi.
23 September 2016 : A ṭum hnih nan Klitschko nena an inhnek tur chu sawn a ni.
3 October 2016 : Boxing a chawlhsan thu twitter hmangin a puang a, darkar thum hnuah 'fiamthu' a nih thu a sawi leh si!
5 October 2016 : Depression laka talchhuah tuma cocaine a tih ṭhin thu a sawi.
10 October 2016 : WBO hnenah a title hlihsak a nih lohna tura thiamthu a sawi theih hun chhung pawhsei sak a ni.
12 October 2016 : BBBofC chuan Fury boxing licence an vil ṭan.
12 October 2016 : WBA leh WBO title a kalsan.
13 October 2016 : BBBofC-in a licence an hlih sak.
6 March 2017 : May 13-ah a lo kir tur thu a sawi a, a thusawi erawh a thleng dik lo.
12 May 2017 : UKAD-in a thubuai ngaihtuah hun an ti khawtlai.
26 July 2017 : A career tawp tawh thu twitter-ah a pholang a, a tukah a thusawi a zuk.
16 September 2017 : Ring chhung rap tura kawng dik a zawh thu a sawi.