Manuel Neuer chawl rei dawn

Bayern Munich chuan an goalkeeper leh captain thar ni bawk Manuel Neuer chu a ke phah vei lam zai nawn a nih avangin kumin chhung an chhawr theih dawn loh thu an sawi.

Kum 31 mi Neuer hi a kephah hliam vangin April thla aṭang khan a chawl a, August thla khan rawn kir ve mah se Thawhlehni khan zai a tawh leh avangin a chawl chhunzawm dawn tihna a ni.

Bayern Munich chairman Karl-Heinz Rummenigge chuan, "Hlawhtling takin zai a ni a, tun hma zawng aia ṭha zawkin Manuel hi January thlaah a rawn kir leh ngei ang," tiin an keeper chungchang a sawi.

Germany international Neuer hian kum2011 khan Schalke aṭangin Bayern Munich a zawm. Bayern tan hian inelna hrang hrangah match 299 khel tawhin Bundesliga nomawi panga, DFB-Pokal pathum leh Champions League nomawi pakhat a chawi tawh - kum 2014 FIFA World Cup-ah khan an ram a champion pui bawk a ni.