Ronaldo a lo kir dawn ta

Zanin dar 1:30-ah Real Madrid-in Real Betis lenchilhin La Liga match an khel dawn a, an tana chanchin lawmawm chu hrem vanga league match li chhung inlan tawh lo Cristiano Ronaldo a lo kir dawn.

Kum 32 mi forward hi Spanish Super Cup-a Barcelona nen an inhmachhawn umin hnawhchhuah a ni a, referee a nam zui avangin a hrem hun chhung hi match liah tih san a ni. Real Madrid-in an player hremna chu uchuak tiin na takin sawisel mah se an star player an chhawr theih phah chuang lo.

Ronaldo tel loin

Real Madrid-in an thiam­puipa tel loin La Liga bul an ṭan a, an league match hmasa berah awlsam takin Deportivo La Coruna chu 3-0 in an sawp nghal. Mahse, Ronaldo tel loin Real an buai lo, tia sawituten an ka an ang hma hret - Santiago Bernabeu-a an hneh ngei tura ngaih Valencia leh Levante a zawnin an inhnehtawkpui a, an match hnuhnung berah Real Sociedad chu 3-1 in an hneh thung.

Zinedine Zidane-a tana thu hriat nuam lo tak ni tel chu Ronaldo chhawr loa a chet chhiat hlanin an elpui ber Barcelona an chesual ve duh lo a, league match liah an chak vek. Real-in Ronaldo an ngai a, a tel loin eng ruai an ni lo - a tichiangtu chu an result a ni.

BB = flop?

Ronaldo awm loh hlanin Ka­rim Benzema leh Gareth Bale te chu Real innghahna an ni a, a pawi ber lai chu Ronaldo pheikhawk hnutchhiahah an ke an thawlh zo lo lutuk kha a ni. Football statistic khawih ṭhin Opta-in an chhinchhiah dan chuan Valencia nena an inhnehtawk ṭum khan Karim Benzema chuan 'goal khung ngeina tur' chance vawi ruk ngawt a nei a, a khung lo fai vek. Bale-a'n Levante lakah vawi thum a nei a, a khung bik lo.

Real-in Ronaldo ringawt pawh an ngaih tehlul nen Benzema a inhliam a, rawlthar striker Borja Mayoral hial an rin a ngai. Lawmna tur an zawng a nih erawh chuan an match hnuhnung bera Sociedad lakah Mayoral-an a puitling tawh tih goal hmangin a pholang a, Bale-a'n a thiam ala theihnghilh lo tih a pholang bawk.

Ngaihlai Ronaldo

Sky Sports Spanish football expert Guillem Balague chuan, "Real hian Cristiano an ngai tih a lanna chu chance tam tak an siam a, mah se a tawp khartu an nei lo ṭhin kha a ni. Thil chiang tak erawh khawvela eng team-ah pawh khel se, Ronaldo awm loh hi chu a lang zel ang," a ti.

Balague chuan sawi chhun­zawmin, "Real hian khelh dan chi hrang hrang an nei a, a changin counter attack, a changin possession an hmang ṭhin. A pawimawh ber erawh a hmawr bawktu a ni a, Ronaldo tel lo chuan chu chu an nei lo. Real hi Ronaldo tel lo pawha champion tum ngam tur khawpin an ṭha tawk a, thil chiang tak erawh Ronaldo a awm chuan goal 40 tal an neih belh dawn tihna a ni," tiin a sawi - Real Betis tan hriat ava nuam dawn lo em!

Kroos a dam tawh

Real-in Ronaldo an chhawr theih dawn piahlamah chanchin lawmawm dang an nei a, Toni Kroos a dam tawh. German midfielder hian Real Sociedad an hneh ṭumin hliam vangin a hmel a lan lo a, mah se Thawhṭanni aṭang khan club training pangngai a zawm leh tawh.

Mahse, Zidane-a naute zing­ah Karim Benzema leh Mateo Kovacic chuan hliam vangin training an la zawm thei lo a, an tel loin Real Betis an hmachhawn ang.

Zanin Inkhel Tur
Deportivo La Coruna 12:30 AM Deportivo Alavés
Sevilla 01:30 AM Las Palmas
Real Madrid 01:30 AM Real Betis