Beisei phak lo Tevez

Shanghai Shenhua chairman Wu Xiaohui chuan an player langsar Carlos Tevez chuan Chinese Super League-ah an beisei ang a phak loh thu a sawi. Manchester United striker hlui hi tun hnaiah a fitness vangin sawisel a hlawh a, khawvela footballer hlawh hnem ber ni mekin kar khatah £615,000 a hlawh!

Kum 33 mi striker hi tun hnaiah an club fan-te ngeiin beisei a phak loh em avangin an 'boo' khum hial a, Gus Poyet-a'n banna a thehluh hnua an coach thar Wu Jingui chuan Argentine striker hi a rihna tinhniam turin a hrilh hial a ni. Tevez hian kar hmasa khan Chinese club tana a goal thumna a khung ve chauh a, Shanghai SIPG lakah 6-1 in an tlawm zui - match nga chhung a zawna an tlawmna a ni.

Shanghai Shenhua chairman Wu Xiaohui chuan, "A tira kan tum ber chu player langsar leh theihna nei sang tak, midang ti phur thei lak­luh a ni a, Tevez hian a tih theih kan ring vek a ni. Mahse, thlasik laia training neih tam loh leh match fitness avangin kan beisei erawh a phak lo," tiin Juventus striker hluiin a hlawh phu tawka a khelh loh thu a pha lo.

Chinese Super Lea­gue-a team 16 awm­naah Shenhua hi 12-na an ni mek a, match 24 an khelh tawhah vawi ruk chiah hnehna an la chang ve a ni.