Nations League finals khel tur Netherlands

Pathianni zan khan Nations League inkhelah Netherlands chuan 1-0 in an elpui Belgium an hneh a, Nations League finals khel turin Dutch team an inpet tling.

Johan Cruyff Arena khelmuala inkhelah Virgil van Dijk chuan Netherlands tan goal awmchhun a khung a, Kevin De Bruyne leh Eden Hazard te neitu Belgium-in a chhanletna tur an neih loh avangin an tlawm.

Netherlands hian nikum khan point khat leka an group hmahruaitu Italy phak lo chungin, Nations League finals an thleng zo lo a, kumina final an lut ta hi an lawm khawp ang.

Phuba
Louis van Gaal-a enkawl Netherlands-in Pathianni zana Belgium nen an intawn hmain point 13 an nei a, Belgium-in point 10 an nei thung - Netherlands tan finals lut turin draw a tawk a, Belgium tan 3-0 tala chak ngei ngei a ngai thung.

Johan Cruyff Arena-a inkhel an nih avangin Belgium hmabak a hautak a, mahse, he team hian an striker chhuanvawr Romelu Lukaku an chhawr thei lo a, Chelsea-a khelhna hmun chan loh vanga Fenerbahçe pantu Michy Batshuayi chungah rinna nghah a ṭul.

Belgium hian June thla khan 4-1 zetin Netherlands an ngam lo a, Belgium boss Roberto Martinez chuan anmahni thing harhtu game a nih tur thu a sawi - Amsterdam khawpuia an intawn hmain phuba la tura an inpeih thu an sawi bawk.

Mahse maw...
Belgium tan coach Martinez chu hrem vangin khelmual sirah a awm thei lo a, assistant Thierry Henry chuan mawhphurhna a la - a tir aṭangin Belgium hian an nawr viau a, mahse, Eden Hazard-a'n a chance neih a chhawr lo a, first half-ah Netherlands an reh.

Second half-ah Belgium tan Amadou Onana chuan chance duhawm nei leh mah se, kum 39 mi ni chunga Nethelands tana a match hmasa ber kheltu Remko Pasveer chuan ṭha zetin a dansak - minute 73-naah Van Dijk a inlar zui a, Cody Gakpo corner aṭanga ball kal chu a tauh lut.

Belgium tan bench aṭanga luhtir Dodi Lukebakio chuan si phurh sutna remchang a nei a, mahse, a overhead kick chuan crossbar a tih per - goal ngat se chuan goal mawi bik huanga khung ngei tur a ni.

A tawp ta!
Belgium-in Netherlands lakah si thum faia chak mamawh mah se goal an khung miah lo a, match 50 chhunga Belgium-in goal an khung lo hmasak ber a ni - he result nena World Cup hmachhawn hi duhthu an sam lawk dan chu a ni lo chiang ang.

Netherlands erawhin Manches-ter United boss hlui Louis van Gaal hnuaia an 'revival' chu an chhunzawm zel a, match 15 zet tlawm nei lo chungin World Cup-ah an zin dawn - an 'puja' a fuh vanglai tak a ni!

Dutch team hian Nations League-a match ruk an khelhah tlawm an nei miah lo - vawi nga chakin, vawi khat draw an nei a, Belgium, Poland leh Wales te nena group khata awm ho an nih avangin, Nations League finals an lut thei hian inrintawkna a siam khawp ang.