Tlai dar 3-ah Venghnuai vs Police
Mizoram Police-in Aizawl FC an hneh avangin inrintawkna nasa tak an nei a, FC Venghnuai pawhin Chanmari FC an hneh avangin eng tem pawh hmachhawn an cho hle. Vawiin tlai dar 3:00 hian RG Stadium-ah FC Venghnuai leh Mizoram Police te an inkhel dawn.
Zote Honda MPL9-ah Police hian tlawm an la nei lo a, an record duhawm tak hi chhawm nung an duh ang. Chutihrualin Venghnuai hian I Day Football semifinal-ah Police hi minute 120 chhung an chelh thei a, an hlau bik dawn lo.
FC Venghnuai tana chanchin lawmawm chu captain Vanlalthanga'n hremna a hmang zo a, Police hmachhawn turin a rawn kir dawn. Hriat tel atana ṭha erawh Thanga tel lo hian Venghnuaiin Chanmari an hneh a, an vanneih vang ni loin chakphu zawk a ni. Chutihrualin inkhelhna hmun hi RG Stadium a ni a, an veng aṭanga a hnaih avangin ṭantu an nei ṭha em em bawk.
Venghnuai coach Lalrindika Hmar chuan, "Police hi team ṭha an ni a, I Day Football semifinal-ah pawh kan hneh tawh lo. Keini aia team ṭha ni mah se hneh kan châk ve khawp mai," tiin Vanglaini a hrilh.
Mizoram Police-in away jersey 'a pawl' an nei thar a, vawiin hian ha dawn. Police hian kawr thar an nei ringawt lo a, an player ṭha sate an tuai thar leh tawh bawk. Aizawl FC an hneh ṭumin F. Lalrinpuia (Valpuia) a rawn che ṭha a, Malsawmfela'n goal a khung leh ta bawk.
Chanmari lakah Aizawl FC-in point an hloh chuan Police tan hmahruai theihna hun ṭha a ni dawn a, Lalbiaksanga Colney hote hian table chung bera awm hi an duh ang. Police hi tun hma aṭangin tualchhung football-ah sulhnu an nei ṭha a, MPL-ah erawh an la champion ngai lo. Tun season-ah ngei hian MPL nomawi chawi an duh.
Police manager Victor Zothansanga chuan, "Jersey min sponsor-tu Lloyd HM Business Centre, Sikulpuikawn leh track Suit min sponor-tu CCR Enterprise chungah kan lawm hle. Board leh Executive te kan inlungrual a, kan chairman hian kawng engkimah min thlawp ṭha. Coaching staff leh player-te kan ringtawk a, Pathian puihna nen kan tum ram thleng turin theihtawp kan chhuah zel ang," tiin Vanglaini a hrilh.