Chanmari FC-in Aizawl FC an elpha em?

Mizoram Premier League ṭantirh aṭanga relegate loa la awm ngar ngar tualchhung club pahnih - Chanmari FC leh Aizawl FC te chu vawiin chhun dar 12:00 hian RG Stadium-ah an inkhel dawn. Zote Honda MPL9-ah pawh CFC leh AFC te hi champion thei tur zinga mi an la ni zel a, club enkawltute an fakawm hle.

Tu nge ropui zawk?
Aizawl FC hi kum 1984-a din daih tawh kha a ni a, sulhnu pawh an nei ṭha. Hun rei tak nung taka kalpui a nih hnuah tualchhung football tlakhniam laiin a thi a, tun hnuah rawn thar thawh leh a ni.

Chanmari FC hi AFC thar thawh leh hnua din a ni a; June 19, 2022 khan din niin tualchhung club zinga ngelnghet zinga mi an ni. CFC hi Aizawl FC aiin an insiamrem hmasa zawk a, MPL ṭantirh lamah chuan club ṭha zawka sawi theih an ni.

Club pahnih hian I League 2nd Division an khel ve ve a, I League khel tura Aizawl FC an tlin tak hnuah erawh club pahnih kawng zawh a dang ta. AFC-in MPL nomawi pali an chawi tawh bakah I League nomawi an chawi tawh avangin an ropui zawk tih chu a chiang a, amaherawhchu MPL nomawi ṭum hnih chawi tawhtu Chanmari hian AFC hi an chung en ngai lo thung.

Beisei pha lo
Aizawl FC-in coach Rozama Fanai kaihhruaina hnuaiah a zawnin vawi thum an chak a, amaherawhchu an club hnehte hi Chanwpui FC, FC Venghnuai leh FC Bethlehem te an nih avangin fiahna tak takah a la ngaih theih loh.

Round 4-ah I League club Aizawl FC-in I Day Football final-a an hneh loh Mizoram Police lakah fiahna an hmachhawn a, an paltlang zo lo. I League club-in Malsawmfela an ngam lo a, Police lakah 1-0 in an tlawm. Coach thar Standly Rozario hnuaia MPL9 match an khelh hmasak berah an tlawm nghal tihna a ni.

Chanmari FC-in point ruk hmu tawh mah se khelmualah game hmuhnawm an khel meuh lo a, Electric Veng FC leh FC Bethlehem hneh turin vanneihna an mamawh a; Chhinga Veng leh FC Venghnuai lakah an tlawm bawk.

Coach Rochhingpuia leh a hoten insiamṭhat an mamawh a, Aizawl FC lakah an lanchhuahtir a ṭul dawn. Chanmari FC hian player ṭha an kawl tam a, amaherawhchu phai lam thlenga tawnhriat nei ṭha Lalramchullova leh Malsawmzuala te an kawl chungin player ṭha bik tiha sawi tur an la awm lo.

FC Venghnuai an hneh loh ṭumin midfielder pawimawh C. Lalhmunmawia (Lahuna) hnawhchhuah a ni a, Aizawl FC a hmachhawn dawn lo. Chutihrualin an squad a chhah ṭha a, tun hi player dang tan hun ṭha a ni thei ang.

I League club pawh an squad a chhah ṭha a, MPL club danga bul ṭan theih tur squad-a dah loh chang an ngah. Heti taka an squad a chhah avangin Aizawl FC chungah beiseina a sang bik a, Chanmari lakah hian an theihna lantir an tum dawn a ni.