Olympic-a boxing hma hun a chiang lo

Russian mi Umar Kremlev chu khawvel huapa amateur boxing thuneitu sang, International Boxing Association President a nih chhunzawm dawn a, hetiang a nih avang hian boxing kal zel dan tur a chiang lo ta hle - Olympic Games hmachhawn lo thei dinhmunah an ding mek.

Amateur boxing-a thuneitu sang ber IBA hi President thar thlanna buatsaih tura beisei an ni a, mahse, Pathianni khan IBA palai kal khawm chuan Presidential election nei lo turin thutlukna an siam - hei hian International Olympic Committee (IOC) hotute ngeng a chhun.

IOC chuan thuchhuah siam nghalin, "He thutlukna duhawm lo tak avang hian, IOC executive meeting chuan a ṭhutkhawm leh hmasak berah boxing chungchang hi a ngaihtuah a ṭul dawn a ni," an ti.

AIBA tia hriat ni ṭhin IBA hi nikuma Tokyo Olympic-ah khan an inhnamhnawih phal a ni lo tawh a, hei hi a chhan ber chu an inrelbawlna, sum leh pai enkawl, refereeing leh thil hrang hranga fel lo tawk awm vang a ni a, nakkum Paris Games-ah pawh IBA hi an inrawlh phal a ni dawn lo.

Tuna hlauhthawnawm ber ta erawh Olympic Games 2028-ah IBA inhnamhnawih lo chauh ni loin, boxer-te pawh infiamna hmachhawn lo thei dinhmunah an ding mek a, boxing hma hun a êng lo rih hle.

Olympic Games 2028 ruahmanna hmasa berah chuan boxing hi infiamna zingah telh a ni lo tawh a, IOC duhdan lo ang taka thutlukna an siam leh bawk si avangin an dinhmun hi an chiang lo ta hle a ni.

IBA President Kremlev chuan, "Olympic Games 2024 leh 2028-a boxing tel tur thu sawi hial a ngai ta a, tumahin khawi aṭang mahin min paih chhuak thei lo ang," a ti a, IOC hmaah tlawm a tum lo hle.

Pathiannia IBA hruaitu inhmuhkhawmah hian Presidential election neih duh leh duh loh chu buk a ni a, palai 36-in President thar thlan ṭul ti mah se, palai 106 laiin hotu thar neih ṭul an tih rih loh avangin Presidential election hi neih a ni rih dawn lo a ni.

IBA president ni lai Kremlev hi Dutch mi Boris van der Vorst chuan President tur hian khin a tum a, mahse, palai tam zawkin President thar neih mamawh loa an inhriat avangin Van der Vorst hian IBA President nih a tum chu a nghah leh phawt a ngai dawn.

May thla khan Van der Vorst hian IBA President ni turin Kremlev hi khin a lo tum tawh a, mahse, Dutch mi Van der Vorst hi President chuh tura tling tawk loa puan a nih avangin Kremlev hi chuhtu awm loin a tling.

June thla khan infiamna khawvela rorelna sang ber, Court of Arbitration for Sport chuan Van der Vorst chu IBA President chuh thei lo turin dik lo taka hrek a nih thu an sawi a, mahse, heti chung hian IBA hian an ngaihdan sawh sawn an tum chuang lo.

Chu mai a ni lo - IBA hian kar hmasa Zirtawpni khan Ukrainian Boxing Federation chu hrem lailawk an ni thu ang puang zawk! Ukrainian boxing thuneitu sang hian, IBA member-te hnenah Kremlev chawlhtir a nih theihna tura hma la turin lehkha an thawn kual a, hei hi IBA chuan hrethiam loin Ukrainian Boxing Federation zawk hian hrem a tawk.

Tuna zawhna langsar ber ni ta chu, Olympic Games 2028-ah boxing a tel ve thei ang em, tih chu a ni a, tun dinhmunah chuan chiang takin a chhanna pek theih a ni lo.