Vietnam leh India an intawng dawn

Hung Thinh Friendly Football Tournament khel tura thang mek India chuan vawiin tlai dar 5:30 hian inelna thlengtu Vietnam an hmachhawn dawn a, Blue Tigers tan champion turin hnehna chan a ṭul.

Vietnam-a neih inelnaah hian India, Vietnam leh Singapore te an inel a, team pathum hi an inkhelh kual vek hnuah a sang ber chu champion tur an ni - Vietnam hian match hmasa berah Singapore an sawp a, India-in Singapore an inhnehtawkpui thung.

Inelna thlengtu Vietnam tan champion turin India inhnehtawkpui a tawk a, Blue Tigers tan hnehna chan ngei ngei a ngai thung - inkhel hi EuroSport chuan live-in an pe dawn a, JioTV, Discovery+ app leh Indian football team facebook page-ah te a en theih ang.

A hming Park
FIFA ranking-a 97-na ni mek, Vietnam hi Asia khawmualpuia football lama ram ṭhang ber pawl an ni mek a, India tan anni laka hnehna chan hi thil awlsam a ni dawn lo - South Korean coach ṭha mi Park Hang-seo enkawlna hnuaia khel an nih avangin hmachhawn an châkawm lo lehzual.

Kum 64 mi Park Hang-seo hian kum 2017 aṭang khan Vietnam enkawl hna a ṭan a, a team a hrechiang - kum 2019-ah phei chuan AFC coach of the Year-ah thlan a ni hial a, Vietnam sorkar chawimawina sang Vietnamese Friendship Order leh Vietnamese Labor Order (3rd class) chu 2018 khan a dawng hial.

Kum 2020-ah phei chuan Vietnamese Labor Order (2nd class) hial pek a ni a, Vietnam mipuiin an ngaihsan khawpin hna a thawk ṭha tih hai rual a ni lo - India a huphurh lo ang tih a chiang a, vawiin tlai inkhel tur en a châkawm ta hle.

Vietnam an ṭha
Zanina India hmachhawn tur Vietnam hi 2022 FIFA World Cup qualification (AFC) a third round khel thei an ni a, he team hian Asian football powerhouse Japan meuh 1-1 a inhnehtawkpuiin, sum ngah China chu 3-1 in an hneh thei a, an ṭha tawk tih a chiang.

Thawnthu hlui keu let a, thil danglam ve tak erawh India leh Vietnam hi vawi khat chiah an la intawng a, Blue Tigers hian October 8, 2010 khan mikhual Vietnam chu 3-1 in an hneh - mahse, kum engemaw zat a liam leh tawh a, thawnthu hluia cham reng a rem tawh lo.

FIFA ranking-ah India hi 104-na an ni mek - ranking aṭanga team pahnih inthlauhna thlir chuan an inthlauhna hi a sang lo hle. Mahse, tun hnaia an team hmachhawn aṭang ringawta teh pawhin Vietnam an ṭha zawk tih a chiang a, India tan a awlsam dawn lo.

En bik tur
Vietnam-in ram pawna khel player pakhat chiah nei mah se player an nei ṭha a, tlarhmaa Nguyen Van Quyet pawh hi a hmuhnawm leh ang - kum 2018 leh 2020 khan V.League 1 Player of the Season a ni a, ram tan match 52-ah goal 14 a khung tawh.

Ram tan match 44-a goal 10 khung tawh, attacking midfielder Nguyen Quang Hai hi lam hmaih a thiang lo - Ligue 2 club Pau tan a khel mek a, AFC Cup All-time XI leh kum 2019-a AFC Asian Cup Team of the Tournament-a tel thei a nih avangin a ṭha tawk tih a chiang.

Kum 29 mi Que Ngoc Hai hi ram tan match 63 khel tawhin, a tawnhriat ringawt pawh Vietnam tan ṭangkaipui tham a ni a, tlarhnungah Vietnam tan innghahna a ni ang.

Stimac hi
Kum 2019 aṭanga India enkawl ṭantu Igor Stimac-a'n Blue Tigers tan hna ropui tak a thawh sawi tur awm lo mah se, AIFF thuneitu sangten a chungah rinna an nghat tlat a, tun hnai khan Asian Cup 2023 thleng atan contract thar a ziak.

Mahse, Blue Tigers a enkawl hnua 31% win percentage neitu hian contract thar a ziah hnua a match hmasa berah pawh India a chakpui zo lo a, hneh ngei tura ngaih Singapore nen 1-1 in an inhnehtawk - India tan result ṭha a ni lo.

Stimac hian India hi match 29-ah kaihruaiin, match kuaah hnehna a chanpui a, vawi kua draw result neiin vawi 11 a chak loh pui - zaninah Vietnam an hneh chuan ram pathum inelnaa ti ṭha ber an ni dawn a, Stimac-a'n he hun ṭha hi bawhpelh a duh lo ang.

India thlirna
Durand Cup-ah hmuhnawm khawpin Lallianzuala Chhangtein hun duhawm tawng mah se, Stimac-a'n Mumbai City forward chungah rinna a nghat ngam lo a, Singapore lakah pawh minute 90-naah a luhtir chauh avangin Mizo tlangval tan danglamna thlen turin hun a awm lo.

Croatian coach Stimac-a'n Vietnam lakah Lianzuala a ring ngam ang em, tih chu zawhna awm mek a ni a, Blue Tigers boss hian Liston Colaco leh Ashique Kuruniyan chu Singapore lakah a ring zawk a, mahse, an beisei ang result an hmu lo, tih chu a hretute kan ni.

Tlarhmaah Sunil Chhetri chu India tan innghahna a ni leh dawn. Kum 38 mi ni tawh mah se Durand Cup-ah a la rintlakzia kan hmu a, ram tan match 130-a goal 84 khung thei hi Vietnam lam pawhin an dressing room titi berah an nei ngei ang.

A hming Lianzuala
India squad-a player 23 zinga Mizo awmchhun chu Lallianzuala Chhangte a ni a, Mumbai forward chuan Vietnam a huphurh loh thu Vanglaini a hrilh. Chennaiyin forward hlui chuan, "Ka huphurh hran lo a, a phurawm tawh zawk viau a ni," a ti.

Lianzuala chuan inkhel tur thlirlawkin, "Ruah a sur nasat avangin duh angin training pawh kan nei thei lo a, inlan tur pawh sawi thiam a harsa rih," a ti a, India-in an duh angin training an nei ṭha tawk lo.

Hetihrual hian Vietnam tan pawh ṭha taka training neih a harsa ve dawn tho tihna a ni a, India tan ruah sur vanga training mumal loh hi chhuanlama hman atan a tling kher lo ang.