National Games atan Mizo infiammi 60 an kal dawn

National Games of India 2022 chu September 27 aṭanga October 10 chhung hian neih a ni dawn a, Mizoram aṭangin infiammi 60 an kal chhuak dawn a, infiamna peng hrang pakuaah inelna an hmachhawn ang.

Inelna hi Gujarat khawpui hrang hrang - Ahmedabad, Gandhinagar, Surat, Vadodara, Rajkot leh Bhavnagar-ah te neih a ni dawn. Player bakah hian team tin aiawhin coach an kal dawn bawk a ni.

Mizoram Olympic Association (MOA) secretary general V. Lalzawmliana chu Mizoram Contingent Chief de Mission a ni dawn. Khel hmasa tur leh a hnuhnung an awm dawn avangin, a khel hmasa tur team - football, weightlifting, wrestling, archery te chu opening ceremony hmang turin vawiin hian Aizawl an chhuahsan ang.

MOA chuan November thlaa Shillong-a buatsaih tur - 2nd North East Olympic Games chungchang pawh an ngaihtuah tawh. NE Olympic Games-ah hian Mizoram aṭangin sports discipline 18 aṭangin infiammi 371 tirh turin thuthlukna an siam tawh a ni.