Novak Djokovic banrek a hliam

Laver Cup an khelhnaah Novak Djokovic chu a banrek a hliam a, season tawp lama a thiam pariatte inelna ATP Finals erawh khelh theih ngei a la inbeisei thu a sawi chhuak - a dinhmun erawh a chiang ta lo.

Tun hnaiah Djokovic hi a inkhel tam lo. Covid-19 vaccine a la duh lo a, hei vang hian United States-ah inelna a hmachhawn thei lo. Tun ṭuma Laver Cup a khelh hi Wimbledon title a lak hnua inelna a hmachhawn leh hmasak ber a ni hial.

Kum 35 mi Djokovic chuan, "A nihna takah chuan tun hnai ni nga chhung vel chu ka banrek ding lam na vangin ka buai. Inrinni khan match hnih ka khel a, chu chuan a nghawng na zual ni pawhin ka hria.

"Tun hma lama duh tawk maia ka service ang khan ka thei tlat lo, chuvangin Pathianni zana match khelh leh nghal kha chu a awlsam lo," a ti. Pathianni zan khan Felix Auger-Aliassime lakah 6-3, 7-6 (7-3) in a chak lo.

Turin khawpuia ATP Finals khelh tur erawhin Djokovic hian ranking point hmuh belh a la mamawh. Tun kar chhung hian Tel Aviv-ah a inlan dawn, chu mi hnuah Kazakhstan Open khelh a tum bawk.

Ruahman dan chuan October thla hian Paris Masters khel turin a inbuatsaih bawk, a zawna tournament pathum khel tur hian a taksa in a tlin a ngem tih erawh zawhna pakhat a tling.

World number 7 Djokovic chuan, "Thla thum deuh thaw inkhel loin ka awm, taksa chet vel dan pawh duhthu a sam vek lo. Chuvangin ngaiawh leh tur chuan training ringawt bakah tournament khelh tam a ngai," tiin a sawi.

Djokovic hian hripui laka invenna a la rih lo a, season thar tir lama khelh tur Australian Open atan pawh a dinhmun a la chiang chuang lo. Australia ramin inkaihhruaina an ti danglam a nih chauhin Melbourne khawpui a pan thei ang.