A squad neihah Tite a lungawi

Tun hnaiah Brazil-in player chhuak thar ṭha tak tak an nei a, coach Tite chuan nghet takin team a rem mek bawk. Brazil coach hian tun dunhmunah chuan a player neihah a lungawi thu a sawi.

Brazil hian friendly match hmasa zawkah Ghana 3-0 in an hneh, goal thum an khung chauh a ni lo, an khingpui lakah an duhtawkin inkhel an thunun thei a ni ber a, goal tam zawk khung turin hun ṭha pawh an insiam hnem.

Zanin dar 12:00 hian Tunisia nen nan inkhel leh dawn, coach Tite-a'n a player koh ho aṭangin a tira lut tur chu a siksawi lehin a rinawm. Tlarhma lama an chhuanvawr Neymar erawh khawih chet thiang lo ang mai a ni thung.

Tite chuan, "Ghana lakah khan ball kan chang hnem a, kan mamawh zat goal pawh kan khung. Chutih rualin second half kan khelh dan kha chu duh ang thlap a ni lo deuh, hmasawn ngaihna lai a la awm nual tih ka hmu.

"Chutih rual chuan goal kan venghim ṭha em em a, kan khingpuite khan hlauhawm an rawn siam meuh lo. Tunisia lakah pawh a tir aṭangin ṭha taka khelh leh kan tum ang," tiin a sawi.

Kum 61 mi Tite hian hun rei deuh tak aṭang khan team nghet tak a din tawh. World Cup qualifier-ah phei chuan hneh loh an tawng miah lo, an rama neih Copa America final-ah erawh Argentina an ngam lo thung.

World Cup neih tirh aṭangin Brazil hi an la inlan char char a, anni chauh hi la tel kim thei an ni hial. Kuminah pawh champion tura rinkai an ni dawn, an player pawimawh zingah hliam an awm a nih loh chuan midang tan hmachhawn an châkawm lo khawp ang.

Inlan Tura Rin
Brazil (4-3-3): Ederson; Eder Militao, Thiago Silva, Marquinhos, Renan Lodi; Fabinho, Lucas Paqueta, Neymar; Raphinha, Richarlison, Vinicius Junior.

Tunisia (4-3-3): Bechir Ben Said; Hamza Mathlouthi, Bile Ifa, Montassar Talbi, Ali Maaloul; Ellyes Skhiri, Ferjani Sassi, Aissa Laidouni; Saif-Eddine Khaoui, Taha Khenissi, Wahbi Khazri.