Team World an chungnung zawk

Mipa tennis team hmanga inelna Laver Cup khelh zawh takah Team World chuan Team Europe an hneh. Pathianni zan khan inelna hi neih zawh niin, match pawimawhah Frances Tiafoe chuan Stefanos Tsitsipas a hneh.

Laver Cup hi tun hma pawhin an neih tawh, a hmasa paliah chuan Team Europe an chak vek. Tun ṭumah pawh hian Zirtawpni leh Inrinnia inelna an neih chinah chuan a che ṭha zawk niin, a tawp niah hian 8-4 in hma an hruai.

Mahse, a hmawr bawk niah Team Europe lam tan Novak Djokovic a chak lo, inkhel dangah Andy Murray chu Jack Sock lakah a tlawm bawk. Singles match hnuhnung berah Tiafoe hi 1-6, 7-6(11), [10-8] in a chak a, belh khawmah Team World hi 13-8 in an chak.

Team Europe-ah hian Europe khawmuala player ṭhate thlan thlawm an ni. Kuminah hian Roger Federer, Rafael Nadal, Djokovic, Tsitsipas, Casper Ruud, Murray, Matteo Berrettini leh Cameron Norrie te an inlan.

Team World-ah chuan, Europe ram ni lo khawvel ram dang zawng aṭanga thlan an ni thung. Taylor Fritz, Felix Auger-Aliassime, Diego Schwartzman, Tiafoe, Alex de Minaur, Sock leh Tommy Paul te an tel thung a, singles leh doubles hmangin an inel a ni.

American player Tiafoe chuan, "Rin phak bak a ni, a nihna tak chuan chak lo zawk tura rinkai kan ni. Inelna ni hnih kan neih hnua hniam zawk kan ni a, a tawp niah Novak a la inlan dawn avangin beisei a tlem angreng hle.

"Mahse, mak tak maiin kan bei thei viau, ka ṭhianten kawng thik tak an sah kuak tawh sa kha a hmawr bawktuah ka ṭang a, a nuam dangdai khawp mai," a ti. Greek tlangval laka hnehna chang tur khan match point vawi li ngawt a inchhanhim a ni.