Prague Open-ah Halep

Simona Halep chuan August thla a khelh tur WTA Prague Clay-court Tournament-ah a inlan tur thu a ti chiang a, inelna lian US Open atan erawh thutlukna a la siam fel theih loh thu a sawi thung.

World number 2 Halep chuan, "Prague hmuna inkhelh ka chak thawin ka phur takzet, him leh hlim takin August thlaah kan inhmu dawn nia," tiin a sawi. Prague Open hi August 10-16 chhunga khelh tur a ni. Romanian nula hian August 3 aṭanga khelh tur Palermo Open-ah pawh a inlan tur thu a lo sawi chiang tawh, tun hma lam aṭanga a inkelh thiamna clay court tournament lamin a rilru a luah tih chu a chiang.

August thla tawp hian US Open khelh tum a ni a, hard court inelna liana tel tum tan chuan US lama tournament khelh a hun chho dawn hle. Mahse, Halep hian New York khawpui ai chuan French Open khel tura Paris pan a thlang zawk a nih pawhin a mak lo ang.

French Open leh Wimbledon champion tawh Halep hian US Open-ah beisei a phak ngai meuh lo, 2015 khan semifinal chu thleng ve mah se season dangah a thleng sang ngai lo. Covid-19 vanga buai mek US lama inkhelh hi player ṭhenkhat chuan an la hreh deuh a nih hmel.