Mangṭha Wales, League B-ah an tla

Pathianni zan inkhel pawimawhah Poland chuan 1-0 in Wales an hneh a, Gareth Bale hoa khel Wales-in mahni mualah goal an khung theih loh avangin League B lamah an tla thla zui - Welsh football tan zan duhawm a ni lo.

Mikhual team Poland tan Karol Swiderski chuan inkhela goal awmchhun a khung a, relegate lo tura draw result mamawh Poland an chak a, chak ngei ngei mamawh Wales an tlawm thung!

Wales hian season thar Nations League-ah chuan League B lamah hun an hman ve phawt a ṭul dawn tihna a ni a, kum 64 hnua a vawi khat nana World Cup khel tur Wales tan World Cup hmuah dan duhawm a ni lo.

A goal
Team pahnihin an sahimna tura an khelh ve ve a ngaih avangin Wales leh Poland inkhelah boruak a sang a, mahse, mipui hmuh châk ber goal hmu tur erawhin nghah rei a ngai hle - Karol Swiderski chuan minute 57-naah inkhela goal awmchhun a khung.

Poland captain chhuanvawr Robert Lewandowski chuan goal khung lo mah se Swiderski goal khung tur hi mawi zeta a siamsak a ni a, Barcelona striker inrawlhna tel lo chuan Poland goal khung a kalh a kim thei lo.

Wales hian goal khung ve theihna remchang nei mah se an vanneih zan a ni lo a, Brennan Johnson-a shot chu Wojciech Szczesny chuan ṭha zetin a dansak a, Gareth Bale chuan uiawm takin crossbar a tauh per bawk.

Mangṭha le
Wales-in 52% ball changin vawi 13 shot an nei a, vawi thum target-ah kal mah se an mamawh ber goal an khung miau loh avangin statistics dangin ṭangkaina a nei lo - ui tak chungin League A an mangṭha a ṭul.

European football-a team ṭhate awmna, League A-ah a vawi khat nan Wales an awm ve a, mahse, team ṭha ber berte nena an inelnaah an ropui lo hle - match ruk an khelhah chak nei miah lo chungin League A an thlah!

Wales hian Belgium chu vawi khat an inhnehtawkpui a, a bak zawngah an tlawm vek! Match rukah point khat an nei a, an hnaih ber Poland hian point sarih an nei -Wales-in World Cup-ah thlen san an tum chuan insiamṭhat ran an mamawh e.