Allan-a'n UAE club a zawm

Everton midfielder Allan chuan Merseyside club chhuahsanin United Arab Emirates club Al-Wahda a zawm a, Asia khawmualpuia season hnih chhung khel turin contract a ziak a ni.

Kum 31 mi midfielder hian September 2020 khan kum thum chhung atan Everton hi a zawm a, a man zat pawh pound maktaduai 21.7 lai niin a chungah fan-te beiseina pawh a sang hle.

Hetihlai hian Allan hi Brazil international niin, South American football thiam ram tan hian match 10 a inlan hman - Napoli-a a pu ṭhin Carlo Ancelotti chuan hetihlai hian English club hi a enkawl bawk.

Allan hian Everton-a a season hmasa pahnihah hian inelna hrang hrangah match 57 zet a khel tling a, mahse, tun season-ah erawh coach Frank Lampard-a'n Idrissa Gueye leh Amadou Onana a lak avangin avangin Allan hi a la inlan miah lo a ni.

UAE Pro League club Al Wahda hian social media kaltlangin Allan an lakluh thu hi an puang a, he thu buatsaih a nih lai hian Everton lamin thuchhuah an la nei rih lo thung.

Al Wahda hi Swansea City leh Sheffield Wednesday manager hlui Carlos Carvalhal-a enkawl team an ni a, Leicester City midfielder hlui Adrien Silva chu a khel mek bawk - Copa America 2019 champion Brazil team zinga tel phak Allan tan chona thar a ni dawn.