A dinhmunah Marquez a hlim

Japanese MotoGP-ah hnehna chang zo lo mah se Marc Marquez chu a dinhmunah a lungawi. Kum 2020 season tira a chetsual hnuah, tun ṭum hi natna nei miah loa intlansiak a hmachhawn lehna hmasa ber a nih thu a sawi hial.

Repsol Honda rider hi a chetsual avangin a ban dinglam ruh a tliak a, hun rei vak lo chhung enkawl tur niin lang mah se rin aiin a rei. Zai nawn a ngai hial a, tun season-ah pawh United States lamah an zai hial.

A lo kir leh hnua a vawi khat nan Marquez hi a hmasa ber aṭangin a tlan chhuak, hnehna chang ta chiah lo mah se atan chuan palina nih phak kha a lawmawm ang, season thar atana beiseina siamsaktu a ni thei ang.

Kum 29 mi Marquez chuan, "Ka tlan ṭha pangngai viauin ka hria, a lawmawm lai ber chu intlansiak chhung zawng kha na ka hre lo. Hun rei tak chhung chu na reh loin ka awm tawh a, ka tan chuan na hre loa inelna hmachhawn chu a danglam zawk hle.

"A nihna takah chuan mahni inrintawkna neih pawh a harsa, intlansiak tir lamah phei kha chuan ka ban khan eng tiang taka rin ngam tur nge pawh hriatthiam a harsa, a tawp ka thlen chiah kha chuan ṭha takin ka tlan thei tih a takin ka ring chiah," a ti.