MVA-in season an khar fel

Mizoram Volleyball Association chuan 2019-20 season kal lai chu an khar fel. MVA-in season a tih tawp tak avang hian a hnuaia inziak lut district leh zone volleyball association zawng zawng pawh a tawp zui nghal ve bawk.

Covid-19 vangin tualchhung volleyball a khelh theih loh, hun rei tak chhung chu inkhelh theih hun nghak mah se an beisei angin boruak a ṭha thei lo. General body meeting neih tura tih pawh sorkar lamin punkhawm a la remtih loh avangin neih theih a la ni lo.

Pro Volleyball League neih theih a nih tak loh avangin, Pro Division aṭanga club tla tur leh leh kai tur ruahman fel a ngai. Season tharah chuan kumina division sang bera awmsa te an awm chhunzawm ang. Mipa huangah - TNT, Hunthar, Chanmari West, Chhinga Veng Spikers, Durtlang North leh Tuichangral te an awm dawn. Hmeichhe lamah Bethlahem Vengthlang , Kanan Veng, Bungkawn leh Durtlang te an awm zel dawn bawk.

Season khar a nih avangin kum thara an kal dan tur rel nghal a ni. 2020-21 season atan club leh player inziahluh hun chu kumin August 6-8 chhung hian neih tur a ni ang. Player registration neih hun hi district, zone leh pro division ten a ruala hman tur a ni ang.