Paes hma hun a chiang lo

India tennis legend Leander Paes chuan chawlh a tum thu lo sawi tawh mah se a hma hun a chian loh thu a sawi leh hnuhnawh. Covid-19 vanga inelna awm mumal thei lo chu a rilru ti buaitu a nih thu a sawi bawk.

Paes hi tunah chuan kum 47 mi a ni tawh a, tun season ṭan dawn khan kumin bak chu inkhelh a tum tawh loh thu a sawi. Mahse hripui leng vangin inelna a awm mumal thei ta lo, a ngaihhlut ber Wimbledon pawh a khel thei lo a ni.

Mipa doubles huanga world number 1 ni ṭhin Paes chuan, "Wimbledon khelh leh ka châk takzet, tennis season ka hman hnuhnung berah chuan grass court inelna lian ka khel ang tih a ni ṭhin. Mahse kuminah erawh a khelh theih ta si lo.

"Season thara ka awm dan tur hi tunah chuan ka sawi chiang thei rih lo, ka chawlh hma ngeiin ka naupan lai aṭanga ka lo dream ṭhin Wimbledon khelh ngei kha tih hlawhtlin leh ka duh," a ti. Season tharah pawh a inkhelh chhunzawm leh ngei a rinawm.