Goal nga nen Liverpool-in Champ19n an lawm

Kum 30 chu rei tak a ni. Chu chu Liverpool-in league nomawi chawi leh tura an nghah zat a ni a, kum 1990 hnua a vawi khat nan Ningani zan khan league nomawi an chawi ve leh ta. 

Fans tam takin an awih thei lo; awih lo phal si loin an mit an nuai a, aw, ni e, an hmuh chu Liverpool captain Jordan Henderson-a'n Premier League nomawi a chawi lai ngei a ni si - a mak a ni! Kum 30 zet chu Reds hian ro an lo rel tawhna English football an thunun thei lo a, an elpui ṭhin Manchester United-in thui takin an tlansan tawh a ni mai lo; Arsenal, Chelsea leh Manchester City te pawh elpui lian tak club an ni hman tawh - a rei asin. Nula leh tlangval senior ten 'a ṭha nghah nana' an hman kum aia tam fe Liverpool fan-ten an nghak tawh a, an nghak chhuak ta. Anfield-ah Chelsea 5-3 in an hneh a, inkhelh zawhah Premier League nomawi an chawi zui. 

Anfield-ah nomawi chawi tur Liverpool an phur a, minute 43 chhungin goal thum an khung hman. Penalty box pawn aṭanga Naby Keita leh Trent Alexander-Arnold-a free-kick pet luh chu eng goalkeeper tan maha dan theih loh khawpa ṭha a ni. 

Georginio Wijnaldum-a'n minute 43-naah an goal thumna a khung a, tunlaia striker 'form' ber pawl Olivier Giroud chuan first half hun pek belhah Blues si phurh a sut ṭhen - beiseina an insiam. Second half-a goal khung hmasa erawh Liverpool bawk an ni a, Roberto Firmino chuan tun season Anfield-a a goal hmasa ber chu Arnold-a ball cross duhthusam aṭangin a tauh lut. Chelsea an awm mai mai bik lo. 

Christian Pulisic luh hnuah an danglam a, American winger hian Tammy Abraham khung tur a siamsak bakah goal khat a khung bawk. Mahse, Anfield-a champion lawm tur Liverpool-in chak chung ngeia nomawi chawi an duh a, Alex Oxlade-Chamberlain goal hmangin chak an nemnghet. 

Liverpool-in Premier League-a nomawi an chawi vawi khatna a ni a, chutihrual chuan english top flight league bikah chuan vawi 19 an champion-na a ni thung. Anfield-ah hnehna an chan leh tak avangin season thum chhung 

a zawnin league bikah an mualah an tlawm ta lo a, tun season Anfield-a an inkhelah point 57 hlawhchhuah theih aṭangin point 55 an hlawh chhuak!

Chelsea laka Liverpool inkhel en chuan season tluana Reds khelh dan an hre chhuak ang a, Arsenal leh Manchester City lakah talbuai zeuh mah se Blues laka an khelh dan thlirin champion an phuzia an hria ang. Inkhel a zo a, Jordan Henderson hnenah nomawi hlan a ni - nomawi hlantu hi Sir Kenny Dalglish a ni a, ani hi league-a Reds champion pui hnuhnung bertu a ni a, Sunderland aṭanga Hendo leitu a ni bawk. 

Hei aia hlim zawk dan tur ka hrethiam lo. Fan-te nen ngei champion hi lawm thei ila ka ti a, mahse thil kan thlak danglam thei lo. Engkim hi an tana ti kan ni. Fan-te pawh lo inring lawk u la, he hri leng ngeiawm tak hi a bo hunah hlim takin kan la lawm ho dawn nia. 

Season duhawm tak a ni a, he club chhungkuaa ka tel thei hi ka lawm takzet a ni. Naupang ka nih lai aṭangin he nomawi chawi hi ka mangphan tawh ṭhin a, chuvanga Liverpool zawm pawh ka ni. Klopp-a'n Reds a zawm aṭangin kum nga a liam ta a, player tin hnathawh rah vek a ni. 

Breda naupang ve mai kha Premier League champion ka ni ta. Mumang chu a tak ram a chang ta a, kan tum chuan engpawh kan ti thei tih he nomawi hian khawvela naupang zawng zawng hrilh rawh se.