Aizawl FC an buai chhunzawm dawn em?
I League champion Aizawl FC-in coach Paulo Menezes hnuaiah Mizoram Premier League Season 6-ah chak an la nei lo a, vawiin dar 3:00 hian Mizoram Police an hmachhawn dawn.
AFC hian an match hnuhnung berah Chanmari West an hneh lo a, hemi hma match thumah an khingpui an draw vek bawk. MPL kai thar Mizoram Police pawhin result ṭha an nei thei bik lo a, vawi thum an chak loh tawh avangin point khat hmuin table mawngphahah an awm.
AFC buaina
Portuguese coach Paulo Menezes-a'n UEFA pro licence hial nei mah se a player-te a la hrechiang tawk lo a, Mizoram football-ah a la bang bo bawk.
Aizawl FC-in Chhinga Veng chak tluang an tihtawp zawhah I League champion-in Chanmari West an hmachhawn a, Portuguese coach hian awlsam taka point hmuh theihna turah ngaiin player paruk ngawt a thlak danglam.
Amaherawhchu, West Warrior hi MFA Super Cup-a final lut thei an ni a, Aizawl FC-in an ṭhat dan ber pawhin hmachhawn se point thum hmuh chianna tur a ni lo. Chanmari West-in I League champion an hneh hi upset a ni lo a, Aizawl FC-in coach thutlukna fuh tawk lo an tuar.
Aizawl FC hian Portuguese coach hnuaiah match ruk an khel tawh a, vawi khat chiah la chakin vawi hnih an chak tawh lo a, vawi thum an inhnehtawk tawh a, MPL6 bikah chak an la nei lo bawk. Season liam taa MFA Super Cup, I Day Football leh I League-a champion thei club hian hetiang result hi an beisei lo ang.
Hmabak erawh a êng?
Aizawl FC coach Paulo Menezes-a'n player naupang zawk chungah rinna a nghat ngam a, forward Jonathan Lalrawngbawla leh winger Rochharzela ten hmuhnawm pawimawh an chang pha a, khelmual chhungah an hmuhnawm bawk.
Portuguese coach Paulo Menezes chuan, "Player ṭha chher hi ka hna a ni a, an hmasawnna ka hmuh hian ka lawm a ni. Chutihrualin tun dinhmunah inrintawkna kan tlachham a, Police kan hneh theih chuan team boruak a dang ang. Point thum hmu turin team ka rem dawn," tiin Vanglaini a hrilh.
Aizawl FC-in MPL5 best midfielder Lalruatfela Zote chhawr lohin an dah thei a, MPL4 best midfielder Vanlalṭhathanga leh MPL3 best midfielder David Lalrinmuana te an kawl a, I League season hnuhnung bera best midfielder Alfred Kemah Jaryan an la kawl bawk. Goalkeeper-ah MPL season li chhung best goalkeeper Lalawmpuia chu a rorelna hmunah khelhna hun pek a la ni lo.
I League an champion ṭuma Shillong Lajong laka goal pawimawh khungtu William Lalnunfela an kawl a, tlarhnungah MPL-a tawnhriat nei ṭha Lalrinzuala leh Lalhriatrenga te thlawp turin Nigerian defender Kareem Omolaja an lalut. Aizawl FC-in football-a Mizo tihmingṭhatu S. Malsawmtluanga an lalut a, tawnhriat nei ṭha an tam avangin hun harsa paltlang thei tur an ni.
Chak duh Police
Mizoram football hrechiang ber zinga mi T. Vanlalhluna'n an hunlaia an sawi ṭhin chu Mizoram Police hliam tuar hmachhawn harsat thu a ni. Dinthar FC-in MPL an champion hmasa bera thluak bur ang hiala sawi theih Hluna'n Police chungchang a sawina hi tun hun thlenga a la dik a nih chuan vawiin tlai hi a lanchhuah hun tur a ni.
Ṭialthawnga hote hian I League champion hmaah an sa huai an ser dawn a, point an hlawh chhuak lo a nih chuan an lungawi lo. Police team-in chak hmel hmuh an duh a, Aizawl FC laka point an hmu thei a nih chuan I League club mamawh inrintawkna an nei thung ang.
Vawiin Inkhel Tur
3:00 PM Aizawl FC Vs Mizoram Police
7:30 PM Dinthar FC Vs Chanmari West
September 22, Zirtawpni
3:00 PM Bethlehem VT Vs Ramhlun North
7:30 PM Chhinga Veng Vs Chanmari FC
# Team Pld W D L GF GA GD Pts
1 Chhinga Veng 4 3 1 0 11 3 8 10
2 Chanmari FC 4 3 1 0 8 2 6 10
3 Chanmari West 4 2 0 2 4 6 -2 6
4 Bethlehem VT 4 1 2 1 5 6 -1 5
5 Ramhlun North 4 1 1 2 4 6 -2 4
6 Dinthar FC 4 1 1 2 6 7 -1 4
7 Aizawl FC 4 0 3 1 4 5 -1 3
8 Mizoram Police 4 0 1 3 5 12 -7 1