Zaninah Aizawl West Derby Dinthar FC Vs Chanmari West
Mizoram Premier Season 6-ah Aizawl West club pahnih an phur lai takin an inhmachhawn dawn. Zanin dar 7:30 hian Lammualah Mizoram Police hnehtu Dinthar FC leh Aizawl FC hnehtu Chanmari West FC te an inhmachhawn ang.
Maimawms-in MPL6-a chak hmel an hmuh hmasak ber zanah Dinthar mipuiin an ṭawiawm ṭha a, I League champion hre lo West Warrior-in ṭantu an nei ṭha bawk. Zanina inkhel tur hi incho tawk leh intum tawk tura ngaih an ni a, inkhel hmuhnawm tak a beisei ngam.
Dinthar FC foreign striker Jackson Victor-a'n Mizoram Police an hmachhawn ṭumin team chak pui thei player a nih tih a lantir a, goal a khung bakah a ṭhiante tan ball ṭha a pe hnem hle. Maimawms hian Jackson bakah Nigerian midfielder Clarence Carter an nei a, an khingpui tur Chanmari West FC hi Mizo hlanga khel an ni.
West Warrior coach HC Zarzoliana chuan, "Chak ngei kan mamawh a, semifinal thleng pha tur chuan tun hi inkhel pawimawh a ni. Chumi tur chuan Jackson-a kan ven uluk hle a ṭul ang," tiin Nigerian striker ṭhatna a hmuh hmaih lo.
Dinthar FC hian point li hmu tawhin parukna dinhmun an hauh mek a, point ruk hmu tawh Chanmari West an hneh erawh chuan a sang pali zingah an invawrh chho thei ang. West Warrior-in foreign player nei lo mah se Mizo zinga talent nei ṭha Jacob Lalrawngbawla, Lalnunmawia, Vanlalthlamuana, Lalremruata leh Lalromawia te an kawl a, Maimawms chunga awm chhunzawm an tum dawn a ni.