I League khel tur a chiang ta
All India Football Federation hnuaia Bid Evaluation Committee chu nimin khan New Delhi-ah an ṭhukhawm a, season thara I League club ni turin Gokulam FC chu an pawm. I League khelh tum hian Gokulam bakah hian Rajasthan-a company pakhat leh Bengaluru club Ozone FC-ten dilna an thehlut a, Kerala club Gokulam hi pawm niin an club hming hi Malabar FC tiin an thlak dawn a ni.
Indian FA hnuaia Bid Evaluation Committee-ah hian League Committee chairman Subroto Dutta, Mizoram Football Association-a honorary secretary leh AIFF League Committee deputy chairman ni bawk Lalnghinglova Hmar, Reliance Sports general manager Chirag Tanna leh AIFF treasurer ZA Thakur te an awm a, nimina ṭhutkhawmah hian AIFF aiawhin general secretary Kushal Das a tel bawk.
New Delhi-a I League khel tur ngaihtuahnaa tel Lalnghinglova Hmar chuan, "Gokulam FC hi Sree Gokulam Group ta an ni a, sum an ngah avangin I League club ṭha tak an din thei ang tih a chiang. Kerala hian football an ngainat avangin kan thutlukna hi Indian football tana ṭha thei ang ber tur ngaihtuah chunga siam kan ni," tiin Kerala club an thlan chhan a sawi.