London club tan EFL Cup a awlsam
Thawhlehni zan EFL Cup-ah Premier League-a London Club pathum an inlan a, hnehna an chang vek. Wembley Stadium hmang thiam lo anga sawi Tottenham Hotspur chuan England stadium hmingthangah ngei hian Barnsley chu 1-0 in an hneh a, an khelmualah an tlangnel sawt ang.
West Ham-in Premier League lamah beisei phak lo mah se League Cup lamah harhna an chang a, an mikhual Bolton Wanderers chu 3-0 in an sawp. Crystal Palace pawhin manager thar Roy Hodgson hnuaiah chak hmel an hmu ve ta a, Premier League lama an elpui Huddersfield Town chu 1-0 in an hneh.
Team ṭha Spurs
Tottenham manager Mauricio Pochettino-a'n Thawhlehni zan an inkhelh hmain Premier League leh Champions League ngaihthah chunga EFL Cup-a a player ṭha khelhtir chu thil atthlak tak a nih tur thu sawi mah se Barnsley an mikhual meuh chuan Dele Alli, Jan Vertonghen leh Mousa Dembele-te inkhel bul a ṭantir a, Wembley-ah tlawm a hlau tih a hriat.
Spurs tan a vawi khat inkhel bul ṭannaah Fernando Llorente chuan goal khungna remchang tak nei mah se a chhawr thei lo a, full back Kieran Trippier thawhrah sengin Alli chuan minute 65-naah he inkhela goal awmchhun a khung thung. Championship club Barnsley-in Liam Lindsay leh Ike Ugbo hmangin hun ṭha nei ve mah se an chhawr thei lo a, a tlawm zawkah an ṭang ta a ni.
Hammers tan Arnautovic
West Ham-in league match nga an khelh tawhah match khat chiah hnehna la chang mah se EFL-ah erawh harsatna an tawk lo. Hammers tan Marko Arnautovic a langsar a, nipui transfer-a pound maktaduai 25-a Stoke City aṭanga an lakuh striker hian Angelo Ogbonna leh Diafra Sakho goal khung tur a siamsak a, Arthur Masuaku chuan yard 25 vela hla aṭangin a khung bawk.
Hammers boss Slaven Bilic chuan, "Arnautovic khelh danah khan ka la lawm tawk lo a, kha aia nasa zawk khan thawkrim turin ka duh. Tun aia ṭha zawka khel tur hian theihna a nei tih ka hria a, a chang chuan amah hian a duhtawk hma mah mah ṭhin a ni," tiin a striker chu tun aia ṭha zawka la khel thei a nih thu a sawi.
Palace chak ve ta
Premier League match nga khelh tawha chak hmel la hmu lo Crystal Palace-in EFL Cup lamah chak result an hlawh chhuak a, Bakary Sako goal khung hmangin Huddersfield chu 1-0 in an hneh. Palace manager Hodgson tan London club a enkawl hnua a match hnihna a ni a, a chak vawi khatna a ni nghal bawk.
Palace boss Hodgson chuan, "Kan chunga harsatna thlengte kha zan khat thil thuah thlak vek theih a ni lo tih chu player leh fan-te hian an hria ang. In din thar tur chuan hun kan la mamawh. Mahse, thim tawpah eng a awm tih ka hria a, chu eng chu tunah hian ka hmu ṭan a ni," tiin a naute khelh danah a lawm thu a sawi.