Chak hmel hmu thei lo LiverPUL
Match li chhung chu Liverpool-in chak hmel an hmu ta lo - Thawhlehni zan khan Reds hian EFL Cup third round-ah Leicester City chu 2-0 in an ngam lo a, inelna pakhat aṭangin petchhuah an ni ta phawt!
Leicester tan Shinji Okazaki leh Islam Slimani ten goal khat ve ve an khung a, King Power Stadium-ah Reds-in a chhanletna tur an nei thei lo - team pahnih hi September 23 zanah Premier League-ah an inhmachhawn leh dawn. Foxes an inrintawk phah sawt ngei ang.
Klopp-a chesual
Liverpool tan Barcelona pan ta lo Philippe Coutinho-a'n inkhel bul a ṭan a, Brazilian international-in khelmual a luahlum chhung zawng chuan Reds hi inkhel thununtu a ni a, Coutinho hi game siamtu a ni. Mahse, second half-ah Klopp-a'n Coutinho la chhuakin Ben Woodburn a luhtir a, Foxes-in Shinji Okazaki an luhtir thung.
Reds-in Coutinho an neih tawh loh laiin Leicester-in Okazaki an nei ta thung a, chu chu game inthlakna a ni. Coutinho tel loin Liverpool game-in awmzia a nei lo sawt a, Okazaki hoin Foxes an khel ṭha sawt thung - minute 65-naah Japanese forward hian goal hmahruai a khung a, Islam Slimani chuan goal ropui hmangin a chhunzawm ve bawk.
Vanduai Reds
Liverpool tan Alex Oxlade-Chamberlain chuan pound maktaduai 35-a Arsenal aṭanga Anfield-a pan hnuah a vawi khat nan inkhel bul a ṭan a, Hull City aṭanga Reds zawmtu Andy Robertson hnen aṭanga a ball fing tak hmuh erawh goal-ah a chantir thei lo. Chelsea aṭanga Reds zawmtu Dominic Solanke chuan khung ngei tur nia ngaih aṭangin goal a khung lo bawk.
Reds hian kar hmasa lawkah Burnley nen an inhnehtawk
ṭumin vawi 35 zet shot an nei a, Klopp-a'n player pariat a thlak danglam chungin Thawhlehni zanah pawh a danglam lo. Foxes lakah Liverpool hian shot vawi 21 ngawt an nei a, net tawn puar zo erawh a awm lo - ball possession 70% an nei bawk a, mah se chak zawk tehna erawh 'goal' a ni.
Ropui lo Reds
Liverpool-in Premier League match hmasa bera Watford an inhnehtawkpui hnuah Champions League group stage khel turin German club ṭha Hoffenheim chu inkhel pahnihah 6-3 in an sawp a, league-ah Crystal Palace leh Arsenal an hneh zui bawk avangin beiseina a sang hman.
Mahse, Etihad Stadium-ah Manchester City-in 5-0 a an sawp hnuah an tho leh tawh lo - Sevilla chu 2-2 in an inhnehtawkpui a, Premier League-ah Burnely 1-1 a inhnehtawkpui zuiin tunah chuan EFL Cup aṭanga petchhuah an ni leh ta! Reds hian an match hnuhnung paliah goal 10 an chhuah tihna a ni a, a chhanletna an neih zat chu goal thum a ni - club lian inti tan chuan thawh a hun tawh takzet.
Klopp a lawm lo
Liverpool-in an goal hmasa zawk an chhuahna kawngah an buaina ngaiah an la buai reng tih an pholang a, corner aṭanga ball kal chu an petchhuah ṭhat tawk loh avangin he ball kal zel aṭang hian Okazaki-a'n goal a khung. Liverpool goal chhuah hmasak bera dem tur chu tlarhnung an ni.
Reds boss Jurgen Klopp chuan, "Hetiang ang goal kan chhuah fo ṭhin hian a ni minti lunghnur em em. Football kan khel a nih chuan khatianga ball petchhuah theih loh chu a thiam loh thlak a ni. Kan inkhel kha tawifel takin a thlir let theih, first half-ah team ṭha zawk kan ni a, game ṭha tak kan khel, mah se goal kan khung lo a, chu erawh thil thleng ve ṭhin reng a ni. Mahse, kan goal hmasa zawk kan chhuah ang kha kan chhuah reng a nih chuan engkim hi a harsa a ni," tiin a lawm lo hle.
Reds-in an match hnuhnung paliah
EFL Cup - Thir Round
Thawhlehni Zan Inkhel Results
Leicester City 2 - 0 Liverpool
Brentford 1 - 3 Norwich City
Wolverhampton 1 - 0 Bristol Rovers
Burnley 2 - 2 Leeds United
(Penalty shootout-ah Leeds United 5-3 in an chak)
Bristol City 2 - 0 Stoke City
Aston Villa 0 - 2 Middlesbrough
West Ham United 3 - 0 Bolton Wanderers
Crystal Palace 1 - 0 Huddersfield Town
AFC Bournemouth 1 - 0 Brighton & Hove Albion
Reading 0 - 2 Swansea City
Tottenham Hotspur 1 - 0 Barnsley