Chanmari FC-in Ramhlun North hneh Zirtawp zanah Chanmari leh Chhinga Veng

Mizoram Premier League Season 6-ah Chanmari FC-in hneh loh an la tawng lo a, champion lai hian Thawhleh zan khan Lammualah Ramhlun North 2-0 in an hneh.

H. Vanlalthlanga kaihhruai Chanmari hian Zirtawpni zan hian anmahni ang bawka point 10 hmu Chhinga Veng FC an hmachhawn dawn a, hmahruaitu inchuhna hi a hmuhnawm ang. I Day Football final-ah Chanmari FC-in Chhingcows hi an hneh lo a, MPL-ah erawh Chanmarians hian Liberian striker Alex Whitte­more an nei tawh.

Goal hnih

First half-a goal a luh loh hnuin minute 51-naah halfway line aṭanga C. Lalrosanga free­kick ball pet chu Vanlalbiaa Chhang­te-in a tauh goal. Hriangtlang tlangval Mabiaa hian angle awm tawh mang lo aṭangin ṭha zetin a tauh a, Ramhlun North keeper Liansangpuia dem theih a ni lo.

Injury time-ah Rosanga free­kick pet bawk chu Ramhlun North defender Lalfelpuia'n an lamah a tauh lut a, Liberian striker Alex a inrawlh thuk a­vangin Thingsulthliah tlangval Fel­puia'n a duhnaah a tauh thei lo.

Tlarhma bil

Ramhlun North hian goal chance an nei hmasa zawk a, ding lam aṭanga C. Ramdinmawia cross chu Tuikual North tlangval Lalremruata'n a tauh na tawk lo.

Coach Samson Rameng­mawia'n inkhelh hmain midfield rem dik a pawimawh thu a sawi a, amaherawhchu Harry Delona Morris Jr.-a'n danglamna thlen thei lo. Liberian midfielder Harry hi darkar khat pelh hretah thlak ni a, ONGC captain hlui V. Lal­­chhuan­awma dam hunah erawh an harsatna tawn mek hi a ziaawm beisei a ni.

Ramhlun North-in striker tlan chak Lalliansanga (Notea) awm lo an tuar tih phat rual a ni lo a, minute nga chiah a awm tawh tihin vei lam aṭanga Lalrinfela cross chu yard ruk lek aṭangin Rosangliana'n goal ruakah a khung lo.

Samson-a hoten Chanmari West an hneh loh zawhah Chan­mari an hneh loh chhunzawm avangin point li hmuin panganaah an awm a, a sang pali chiahin semifinal an khelh dawn avangin an dinhmun a ṭha lo.

Piancham lawmna

Nimin kha Chanmari FC coach H. Vanlalthlanga pian­cham pha a ni a, hemi urlawk zanah a nauten point thum an hlawhchhuah sak.

Chanmari tana thu lawmawm chu Jakob Vanlalhlimpuia'n match hnih hremna a hmachhawn hnuah goal khung châkin a rawn kir a, Hnahthial rawlthar hi Ram­hlun North tan buaina tham a tling.

Tlarhnung lamah Ro­sanga hoin Chanmari tlarhnung chu rem phui a ni a, Lunglei tlangval hian captain Rochhingpuia chhuah hnuah captain armband hrengin team a kaihhruai hneh hle. Thlanga hoten hian MPL6-ah goal hnih chiah la chhuahin goal an la chhuah tlem ber.

Zirtawp zan

Tualchhung football ngaina­tute chuan Zirtawpni zana Chan­mari FC leh Chhinga Veng inkhel en tumin an inpuahchah ṭan der tawh ang.

Chhingcows-in he inkhel tur pawimawhna hre reng chungin an match hnuhnung berah an striker neih ṭhat ber Malsawmfela an dah ṭha a, Chanmari FC-in an nomawi kawl lai chhuhsak tumtu lakah tlawm an tum lo ang.