Messi ropuina a zual zel

Lionel Messi ropuina tihlanin a awm zel - Thawhlehni zan khan La Liga match-ah Barcelona chuan 6-1 in an mikhual Eibar an sawp a, he inkhelah hian Lionel Messi chuan goal li ngawt a khung - Argentine forward hian tun season inelna hrang hrangah goal 12 a khung tling leh der tawh!

Barcelona tan Messi bakah Paulinho leh Denis Suarez ten goal khat ve ve an khung bawk a, nipui transfer bazar-a Barca a pan tirha sawisel hlawh Paulinho-a'n amah sawiseltute khelmual chhungah a chhanlet chhunzawm zel.

Inkhel chu

Nou Camp-a inkhelah Barca chu chak tura rin sa an ni a, rinlawk ang ngeiin an khel bawk - minute 20-na lekah Messi chuan goal hmahruai a khung a, a aite chhinna chauh a la ni. Argentina captain hian minute 59, 62 leh 87-ah te goal dang a khung chhunzawm a, La Liga match a khelh hnuhnung paliah goal kua a khung ta.

Messi goal khung kar lakah Paulinho leh Denis Suarez ten goal khat ve ve an khung ve bawk a, minute 57-naah mikhual team tan Sergi Enrich chuan goal khat khung ve mah se Barca laka mualpho zualpui khuhna goal chauh a ni.

Messi leh goal 300

Lionel Messi-a'n a goal lina a khung chiah khan Barcelona tan Nou Camp-ah bik goal 301 a khung tlingna chiah a ni a, he player hi chu 'a ropui a ni' tih baka hrilhfiah dan a vang hle. Messi hian Barcelona tan league match bikah match 387 khelin goal 358 a khung tawh a, inelna hrang hrangah Barca tana a match khelh zat hi 591 niin goal 519 a khung thei!

Messi-a'n tun season league match nga a khelhah goal kua a khung tawh a, inelna hrang hrangah match riat khelin goal 12 a khung - he player ropui hian goal khung a ṭhulh san thut hmel si loh a, tun season-ah pawh goal 'engemaw zat' chu kan hmu leh ngei dawn niin a lang.

Messi faktu Valverde

Barcelona coach Ernesto Val­verde chuan, "Messi hi footballer ka hmuh tawh zawng zawnga fing ber a ni. Awm lo ata a rawn lang nawlh ṭhin ni mai hian ka hria a, mi chungchuang bik a ni. Messi ṭhat zia sawi tur hian eng ṭawngkam nge hman tur pawh ka hre lo," a ti!

Valverde chuan inkhel thlir­kir zuiin, "Inkhelh zawha goal lut zat kha in en chuan awlsam taka hnehna changah min ngai mai thei. Mahse, chutiang chu a ni hauh lo. Eibar kha team huaisen tak an ni a, game hautak zet min khelhtir a ni," tiin an khingpui club a fak.

Valencia tan Zaza

Simone Zaza-a'n player satliah a ni lo tih pholangin Malaga lakah goal thum a khung a, a team Valencia chu 5-0 ngawtin hnehna a chanpui. Valencia tan Santi Mina chuan goal hmahruai a khung a, Zaza hian minute 54 leh 63 inkarah hattrick siamin Rodrigo chuan an goal ngana a khung.

Italian striker hian season hmasa khan West Ham chu Juventus aṭangin loan-in a zawm a, match riat a khelhah goal a khung miah lo. Hammers-ah beisei a phak loh avangin January khan Valencia hi loan-in a zawm a, nipui transfer-ah khan a ngheta lakluh a ni - tun season-ah match nga khelin goal li a khung ta.