Lewis Hamilton-a'n beisei a nei sang

Lewis Hamilton chuan tun hnaia Mercedes hmasawnna avangin season tawpah Formula 1 champion a nih theih ngei a beisei thu a sawi chhuak.

Ferrari-in Monaco leh Hungary-ah pakhatna leh pahnihna dinhmun an luah thei a, Singapore Grand Prix-ah pawh Sebastian Vettel-a'n pole position aṭangin bul a ṭan. Mahse, Singapore intlansiakah hian Ferrari driver pahnih an chesual a, Britain tlangval Hamilton-a'n hnehna a chang thung.

World champion vawi thum ni tawh Hamilton hian driver championship point 263 hmuin hmahruaitu a ni a, German driver Vettel nen an inkarah point 28 zet a awm tawh - October 1 tlaiah Malaysia Grand Prix an tlan leh ang.

Kum 32 mi Hamilton chuan, "Hma kan sawn chho zel a, kawng huh leh roah pawh harsatna nei loin intlansiak kan hmachhawn thei tih a chiang tawh hle. Season bul ṭan chhoh lai kha chuan Ferrari kha rinkai leh team ṭha zawk an ni a, tunah erawh rinkai zawk a sawi theih tawh loh - kan dinhmun a ṭha tawh zawk," tiin an elpui team lakah chungnung zawk nih a inbeisei hle.