Moon-a'n Olympic a hlawhtlin a beisei
South Korea president Moon Jae In chuan nakkuma Winter Olympic an thlen tur chungchang sawipuiin New York-ah International Olympic Committee (IOC) president Thomas Bach a hmu a, inelna hlawhtling taka buatsaih a nih theih a beisei thu a sawi.
Nakkum February 9-25 chhung hian Pyeongchang-ah Winter Olympic hi neih tur a ni a, inelna an neihna tur hmun hi North Korea ramri aṭanga hla vak lo a awm a ni.
Tun hnaiah North Korea-in a ralthuam chi hrang hrang a enchhin nasa hle a, United States leh a thawhpui ram bakah United Nations chuan nasa taka sawiselin a hrek hial. South Korea hi an ramri North Korea nen an politics boruak a chhiat em avangin Olympic pawh hian buaina a tawh palh hlautu an tam hle.
South Korea president Moon Jae In chuan, "Pyeongchang Games chu muanawm takin kan neih ngei ka beisei, he infiamna khawmpui lian hian Korea ram pahnih boruak ṭha lo pawh a siamṭhat ngei beisei a ni bawk," a ti. Inelnaah hian North Korea infiammite tan hmun a awm thu a sawi lang tel bawk.
Ram hrang hrang intelkhawm chuan Winter Olympic-ah hian Russia an tel loh nan IOC hnenah ngenna an thehlut tawh bawk a, damdawi hman phal loh hman vanga hrem tuar mek Russia leh North Korea politics vang hian infiamna khawmpui lian hian beisei a phak loh hlautu an tam hle a ni.