Boxing khawvelah Rio

Manchester United legend Rio Ferdinand chuan professional boxing a luhchilh dawn. England in­ternational hlui hi May 2015 khan a nupui Rebecca chuan kum 34 leka upa nichungin cancer natna avangin a thihsan a, fa pathum an nei hman. A nupui thih kum hian football a chawlhsan nghal.

Ferdinand chuan, "Ka thinrimna, hrehawmna leh lungngaihna te hrik thlakna tur ka duh a, boxing hi chumi atana min pui theitu tur chu a ni," tiin boxing a luhchilh chhan a sawi.

WBC super-middle­weight champion hlui Richie Woodhall coach-na hnuaia training nei tur Rio chuan, "Boxing chhungkua hi ka zah em em a, title lak ka tum thu sawi nghal ila he infiamna huang chhunga rei tak lo awm tawhte zah lohna a ni ang. Ka tan chuan hei hi chona a ni a, ka taksa leh rilru tan chona a ni. Chona hmasa ber kalpelh phawt ka duh a, chuta ṭang chuan engkim a chiang ang," a ti.

Ferdinand hian football a khelh laiin Premier League (6) leh Champions League (1) nomawi a chawi a, footballer zing­ah Birmingham City mid­fielder hlui Curtis Wood­house leh Crystal Palace forward hlui Leon McKenzie te chuan boxing an lo luhchilh tawh bawk - Woodhouse hian British super-lightweight champion dinhmun hial a luah thei.

England cricket cap­tain hlui Andrew Flintoff chuan boxing hi a lo luhchilh tawh bawk a, mah se vawi khat chiah inhnek hmachhawnin American boxer Richard Dawson a hneh a ni.