Zaninah hmahruaitu nih inchuhna Chhinga Veng Vs Chanmari FC
Mizoram Premier League Season 6-ah Chhinga Veng leh Chanmari FC te chiahin hneh loh an la tawng lo. Zanina MFA Super Cup leh I Day Football nomawi kawltu Chhingcows leh MPL champion lai Chanmarians te inkhel tur hi inkhel hmuhnawm bik a ni ang.
Zan dar 7:30-ah inkhel hi ṭan a ni dawn a, zanin hi Lammuala football ngainatute punkhawm zan tur a ni. Chhingcows-in an intawn hnuhnung pahnihah Chanmari an hneh avangin Chhinga Veng mipuiin season khat chhunga lungthu kim nan tiin an veng club an ṭawiawm dawn a, Chanmarians lamin result an neih ṭhat chhoh avangin beiseina nung nen Lammual an pan ang. Inkhel a hmuhnawm dawn avangin neutral supporter an ṭhahnem tura ngaih a ni bawk.
Sanga 2 - 0 Thlanga
Mizoram football-ah Chanmari FC coach H. Vanlalthlanga 'n sulhnu chhuantham a hnutchhiah tawh a, chung zinga pawimawh tak chu coach ṭha tak ni tura Lalsangzuala Hmar a chher thei hi a ni. Amaherawhchu tun season-a coach ṭha pahnih intawn tawhah Sanga kaihhruai Chhinga Vengin Thlanga hnuaia khel Chanmari FC vawi hnih an hneh tawh a, an pahnih intawnna bikah 2-0 in hma a hruai mek.
Sanga hian MPL hmasa ber playoff-ah Chanmari FC enkawl tawh mah se head coach hna a chelh rei lo a, ama puala club a enkawl leh hmasak ber chu MPL4-a Bethlehem Vengthlang FC a enkawl kha a ni. BVT hi MFA Super Cup-ah a champion pui a, MPL5-ah Chanmari FC champion pui zuiin tun season-ah MFA Super Cup leh I Day Football-ah a champion leh tawh bawk. Hei erawh hriat a ṭha, MPL-a vawi hnih champion thei coach an la awm lo.
Hneh loh la tawng lo
MPL6 bikah Chhinga Veng leh Chanmari FC-in match li an khelh tawhah vawi thum ve ve an chak tawh a, Aizawl FC lakah point khat an hlawh chhuak ve ve bawk.
Chhingcows hian goal 11 an khung tawh a, goal thum chuah tawhin goal difference ṭhat vangin Chanmari FC chungah an awm. Veteran coach Thlanga kaihhruai team hian goal riat khung tawhin goal hnih chiah an la chhuah a, goal la chhuah tlem ber an ni a, tun season inelna hrang hranga goal 82 khung tawh team lakah fiahin an awm dawn.
Sawmfela telin
Chhinga Vengin zanina Chanmari FC nena an inkhel tur hre reng chungin Malsawmfela chu Bethlehem Vengthlang FC an hneh ṭumin an awltir a, MPL6 bika goal li khung tawh striker chuan, "Hahdam ka mamawh a, coach-in hahdamna hun min pe hi ka lawm," tiin Vanglaini a hrilh.
Chhingcows boss Sanga pawhin, "Sawmfela hi Chanmari FC hmachhawn tura kan hahdamtir tia an sawi pawhin a sualna a awm lo. MFA Super Cup leh I Day Football zawng zawngah a khelh vek avangin hahdam hi a mamawh a, tunah chuan fit ṭha takin a khel thei ang," tiin an club top scorer an khelhtir tur thu a sawi.
Sawmfela awm loh hlanin MS Dawngliana'n goal hnih a khung a, Bawngkawn tlangval hi Malsawmfela ang thoa MPL-a sulhnu nei ṭha a ni a, Lalkhawpuimawia leh Lalrammuanpuia an la neih bawk avangin goal an khung ngei pawh a rinawm. Sanga hnuaiah Chhingcows hian match 16 khel tawhin goal an la khung vek.
Chanmari an inpeih
Chanmari FC-in MPL6-ah goal hnih an chhuah tawh a, tlarhnung phui ber record nei mah se I Day Football-ah Chhinga Veng hi vawi hnih hmachhawnin goal sarih an chhuah. Hemi chungchang hi sawiin Chanmari coach H. Vanlalthlanga chuan, "Kan dan theih tawh ngei ka beisei a, chumi tur pawh chuan inpuahchahna kan nei ṭha a ni," tiin a naute a rintawk thu a sawi.
Liberian forward Alex Whittemore-a'n MPL match thum a khelh tawh aṭangin goal a khung lo a, amaherawhchu foreign striker awm hnu match thumah Chanmari hian goal sarih an khung. Thlanga chuan, "Alex-a hian goal khung lo mah se goal kan khung theih nan a thawh hlawk a, hlauhthawnna ka nei lo," tiin Vanglaini a hrilh.
Mipui an pawimawh
Match pawimawha danglamna thlentu chu mipui an ni a, zanin hi football club pahnih inelna ni ringawt loin Chhinga Veng leh Chanmari mipui inelna a ni tel ang.
Chhinga Veng hi tun season-a thawm nei ring zawk an ni a, amaherawhchu Chanmari vanglai an la pha lo. Chanmarians hian Thlanga hnuaia MPL hmasa bera an champion ṭuma an thawm ang an rawn nei leh a nih ngat chuan Chhinga Veng tan a chhanlet nan an aw rawl tawpa an au a ṭul dawn a ni.