Thlanga record a la u zawk

Chhinga Vengin tun season-ah match 14 chhung a khingpui hneh vekin MFA Super Cup leh I Day Football nomawi an chawi a, an record tihtawp saktu chu Aizawl FC an ni.

Coach Lalsangzuala Hmar hnuaia match 14 chak thei Chhinga Veng record ropui mah se H. Vanlalthlanga hnuaia Chanmari FC record an la tluk pha lo. Thlanga'n Chanmari FC a enkawl hmasak ṭumin match hmasa 15 chhung hnehna a chanpui thei a; nomawi pathum MFA Cup, I Day Football leh MFA Super Cup nomawi an chawi bawk - hei erawh hriat tel a ṭha, Thlanga hnuaia Chanmari ropui laia a thachhang dawltu chu Sanga a ni.

Thlanga hnuaiah Chanmari hian match 21 chhung hneh loh an tawng lo a, Dinthar FC-in an record duhawm tak hi an tihtawp sak. Tunah hian Chhinga Veng hian Sanga hnuaiah match 16 chhung hneh loh an tawng lo a, Chanmari hian an tihtawp sak a nih loh chuan Thlanga record a derthawng sawt ang.