Chelsea leh Arsenal chak nuamsa

League Cup fourth round lut turin London club pahnih Arsenal leh Chelsea tan hna harsa a awm lo. Nilaini zan khan Blues hian Nottingham Forest 5-1 in an sawp a, inkhel dangah Theo Walcott goal hmangin Gunners chuan Doncaster Rovers 1-0 in an hneh bawk.

Stamford Bridge-ah Eden Hazard-a'n tun season-a a vawi khat nan Chel­sea tan inkhel bul a ṭan a, Belgium inter­national midfielder hian assist vawi hnih a nei nghal. Blues tan striker Michy Batshuayi chuan hat trick siamin Brazilian wing-back Kenedy leh Charly Musonda ten goal khat ve ve an khung bawk.

Antonio Conte-a'n Arsenal nena inhnehtawk hlim team aṭangin player pakua a siksawi a, Cesc Fabregas leh Tiemoue Bakayoko ten midfield an thunun laiin Hazard chu tlarhma lam puihtir a ni a, an goal hmasa pathum chu a thawhrah a ni.

Chelsea manager Antonio Conte chuan, "Ka player naupang zawk ten khelhna hmun an neih chhunah beiseina min siamsak ṭhin a, skills an neih ṭhat bakah tharum pawh an ngah tawh hle a ni," a ti. Blues hian defender Ethan Ampadu (17), Jake Clarke-Salter (19) leh England Under-19 international Dujon Sterling te tan khelhna hmun an siam sak.

Chelsea hian fourth round-ah chuan Everton an hmachhawn leh ang. Inkhel dangah Ronald Koeman-a naute hian Premier League aṭanga tla hlim Sunderland chu 3-0 in an hneh.

Tun hnaia result ṭha nei hleithei lo Toffees manager Koeman chuan, "Hun harsa kan tawh laia damdawi ṭha ber chu goal khung chunga hnehna chan a ni. Player zawng zawng an thawkrim vek a, a tawpah result ṭha kan nei ta a ni," tiin a sawi.

Emirates Stadium lamah pawh Arsene Wenger-a'n Blues laka bulṭantu player 11 zet a awltir ve bawk. League One club Doncaster lakah Olivier Giroud-a'n mawi zeta overhead kick neiin goal bar a tih per a, forward Alexis Sanchez-a siamsak chu Walcott-a'n tun hnai a match 10 chhunga a goal hmasa ber ni turin a khung.

Arsenal manager Arsene Wenger chuan, "Doncaster khan an thawkrim em em a, fak an phu hle. Minute 35 chhung ṭha takin kan khel a, a hnu lamah kha chuan zawi muangin kan khingpuite khan min lehthal lek lek a ni," a ti.

Gunners tan Jack Wilshere-a'n kum 2016 May thla hnua a vawi khat nan inkhel bul a ṭan a, manager Wenger chuan England international hi league lamah pawh chhawr tlak a nih tawh thu a sawi bawk.

October 23-ah fourth round khelh leh tura ruahman a ni a, Arsenal hian Emirates Stadium-ah Norwich City an mikhual leh dawn, Liverpool hnehtu Leicester City leh Leeds United an intawng bawk ang.