Goal ruk nen Aizawl FC an tho

Aizawl FC-in Mizoram Pre­mier League Season 6-ah a vawi khat nan hnehna an chang. Nimin tlai khan I League champion hian Lammualah Mizoram Police 6-1 in an sawp.

Chhinga Veng tlangval Rochharzela'n hattrick a siam a, Hmingthanmawia (Valpuia), Alfred Kemah Jaryan leh Jona­than Lalrawngbawla ten goal khat ṭheuh an khung bawk

Goal 3 phawt

Aizawl FC-in bul an ṭan ṭha a, Chhara'n minute 9-na leka goal a khung nghal avangin hna hautak hmachhawn tur an nei tawh lo.

Mizoram Police-in siphurh sut ṭang ve bawk mah se Ram­hlun North tlangval Valpuia'n minute 35-naah Police tlar­hnung a paltlang hnuah mawi zetin a pet goal.

Minute khat pawh ral hmain captain Alfred Kemah Jaryan pass chu Chhara'n a goal hnih nan a khung. Police tlarhnung pawp zui mah se goal dang a luh belh lo.

Goal thum dang

Aizawl FC-in second half-ah an nawr chhunzawm a, Police keeper Lalṭanpuia'n Nigerian keeper Kareem-a cross a man sual zarah Chhara'n hattrick a siam.

I League club tlarhma lamin goal chance an hlah hnem a, Kareem-a'n minute 78-naah an lamah a tauh lut. AFC-in goal chhuah mah se inkhel an thunun avang leh goal li an neih avangin hlauhthawnna tur a awm tawh lo.

Aizawl FC captain Alfred-a'n minute 80-naah goal ngana a khung a, Police hliam tuar tho chhuak tur an awm lo.

AFC substitute H. Lalmuan­kima'n penalty a hlawh chhuak a, chance ṭhahnem tak hlahtu Jojo-a'n cool takin I League club goal rukna a khung.

AFC an invawrh

Aizawl FC-in hnehna an chan avangin point ruk an hmu a, relgation playoff khel thei dinhmun aṭangin semifinal khel thei dinhmun an ding.

Mizoram Police erawh point khat chauh la hmuin table mawngphahah an awm thung.