Sindhu leh Saina zinkawng a tawp

Badminton inelna Japan Open Superseries khelh mekah nimin khan hmeichhe singles last 16-ah Saina Nehwal leh PV Sindhu te an chak lo, mipa lamah Kidambi Srikanth leh HS Prannoy te erawhin quarterfinal an in vaw kai thung.

Tokyo Metropolitan Gymna­sium-a inkhelah Olympic silver me­dalist Sindhu hi minute 47 chhungin tualchhung nula chhuanvawr Nozomi Okuhara lakah 21-18, 21-8 in a chak lo. Sindhu leh Okuhara te hi vawi kua an inhmachhawnna chiah a ni a, Okuhara hian record nei ṭha zawkin 5-4 in hma a hruai.

Sindhu chak loh hnuah Saina a inlan zui ve leh a, kum 27 mi Saina pawh Olympic champion Carolina Marin lakah 21-16, 21-13 in a tlawm. Saina leh Marin te hi tun hma lamin World Championship final-ah an intawng tawh bawk a, Spain nula Marin hi a chungnung zawkah a lo ṭang tawh bawk a ni.

Mipa singles-ah Srikanth-a'n harsa lo takin Yun Hu chu 21-12, 21-11 in a hneh a, inkhel dangah HS Prannoy pawhin Hsu Jen Hao 21-16, 23-21 in a hneh ve bawk. Srikanth hian Viktor Axelsen a hmachhawn leh ang.