Burton tan Rashford a hriam lua

Marcus Rashford-a'n Cham­pionship club Burton Albion lakah player hriam bik a nih zia a lantir. Manchester United striker hian Burton lakah goal hnih a khung bakah Anthony Martial goal khung tur siamsakin a club chu 4-1 in hnehna a chanpui.

Nilaini zan League Cup third round inkhel dangah Premier League club pahnih an intawng a, Pep Guardioa kaihhruaina hnuaia kal fawr chho mek Manchester City chuan khualmualah West Brom 2-1 in an hneh ve bawk.

Old Trafford-ah keeper Sergio Romero-a'n season hmasa Europa League final hnua a vawi khat nan inkhel bul a ṭan a, captain Michael Carrick pawhin season kal laia a vawi khat nan khelmual a lut bawk. League match hnuhnunga Everton hnehtu zingah Rashford leh Juan Mata te chiahin inkhel bul an ṭan nawn a, defender Luke Shaw pawh bench aṭanga tlan luhtir a ni.

Kum 24 mi Jesse Lingard-a'n England forward Rashford goal khung turin Carrick ball pek a dan per sak zeuh a, Rashford hian box pawn aṭangin kawh zetin an goal hnihna a chhuih lut bawk - goal khatna siamsaktu Lingard pawhin goal khat a thawh belh bawk.

Champion lai Manchester United hian fourth round-ah Premier League club Swansea City an lenchilh leh ang. Jose Mourinho chuan League Cup inelna chu an ngaihpawimawh tur thu a sawi.

Man United manager Jose Mourinho chuan, "Inelna hi official a nih chuan Manchester United leh ka tan a pawimawh tihna a ni. League Cup tel lo hian English football hi a ṭha zawk mai thei a, Champions League atan hun awl neih hnem a ṭha zawk mai thei bawk. Mahse, inelna buatsaihtu leh kan khingpuite kan zah tur a ni a, kan theihtawp kan chhuah tur a ni," tiin a sawi.

City an chak

Hawthorns-ah mikhual Man­chester City tan Leroy Sane-a'n goal hnih a khung a, Claudio Yacob-a goal khungin West Brom a chhanhim zo lo. Hliam vanga thla kua vel zet chawl tawh Ilkay Gundogan-a'n inkhel bul ṭan ve mah se Yacob nen an intauh palhna vangin minute 59-naah thlak a ngai.

City hian tun hnai an match hnuhnung pathumah goal 15 an khung thei a, Baggies lakah erawh beisei angin goal an khung hnem lo. Striker Gabriel Jesus leh Raheem Sterling ten keeper Ben Foster an paltlang thei lo a ni.

Man City manager Pep Guardiola chuan, "Inkhel hautak tak a ni a, league match khelh hmain kan hahdam hman ka beisei," a ti. Spanish manager Pep hian a midfielder Gundogan hliam chu tun hma lama a hliam tawrh tawh anga nasa a nih loh a beisei thu a sawi tel bawk.