Ronaldo telna Real Madrid an tlawm

Cristiano Ronaldo awm loh hlanin Real Madrid an talbuai a, an thiampuipa lo kir hnuah eng ruai an ang chuang lo - Nilaini zan khan La Liga match-ah Real Madrid hian Real Betis an mikhual a, 1-0 in an tlawm.

Real-in match 73 chhung a zawna goal khunga Spanish record an siam kal lai chu a tawp ta a, Ronaldo hoin goal an khung lo - Betis tan kum 1998 hnua Real khelmuala hnehna an chan lehna hmasa ber a ni a, goal awmchhun khungtu Antonio Sanabria chu Finidi George hnua Betis player Santiago Bernabeu-a goal khung thei hmasa ber a ni bawk.

RonalNO?

Real Madrid-in Ronaldo awm loh hlanin league match li an khel a, vawi hnih hnehna changin vawi hnih an khingpui an inhnehtawkpui. Nilaini zanah Ronaldo a lo kir dawn avangin Real an phur a, an thiampuipa hoin chak ngei tura ngaih sa an ni - mah se beisei ang ngawtin thil erawh a kaltluang lo.

Portugal captain hian goal khung ngei tumin vawi tam a pet a, mah se a 'day' a ni tlat lo - back heel hmanga a goal khung nei tur nia ngaih chu line aṭanga petchhuah sak a ni a, hla tak aṭanga a ball pet chu Betis goalkeeper Antonio Adan chuan a dan sak bawk. Ronaldo-a chance neih ṭhat ber chu Gareth Bale ke aṭanga chhuak a ni a, mah se kum 32 mi forward hian Wales forward duhsakna hi lawmnaah a chantir thei lo.

Real is Betis

Santiago Bernabeu-ah hai rual lohin Real Madrid chu team ṭha zawk an ni a, chak zawk tehna erawh goal a ni - chak zawk tehnaah Real an tling tlat lo! Spanish champion hian Betis goal-ah vawi 27 ngawt goal khung ngei tumin shot an nei a, net tawn puar zo erawh a awm lo.

Ronaldo piah lamah Luka Modric leh Bale te chuan hun duhawm an nei ve ve bawk a, mah se an chhawr lo - player pahnih chance neih erawh 'mimal' thiam vang a ni. Real-in goal khung an tum luatah tlarhnung a pawp a, Antonio Sanabria-a'n offside goal a khung khan chu chu hriattirin an awm tawh. Mahse, Real-in insiamṭhat phah nan an hmang lo a, kum 21 mi forward hian hun pek belhah Betis chakna goal a khung - Real tan chhanletna hun a awm tawh lo.

Real veltu Barca?

Real Madrid tan chuan Bar­celona hi 'mangchhia' tih loh rual an ni lo. Real an tawlhthluk laiin Catalan club hi an tawlhthlu ve duh lo a, match nga an khelh tawhah hnehna an la chang fai vek - table a hmahruaitu dinhmun luah mek Barca leh Real inthlauhna zat hi Ronaldo jersey number zat 7 a ni.

Nilaini zana Real laka goal khungtu Sanabria hi Barcelona youth system chhuak a ni! Paraguayan striker hi Barcelona senior team tan erawh a inlan hman lo a, an B team tan 2013-14 season-ah khan Segunda division-ah match 10 khelin goal thum a khung sak. Sassuolo, AS Roma leh Sporting Gijon tana a khelh kual hnuah season hmasa khan Betis a pan a, club dang tana a khelh hnuah pawh Real elpui ber Barca tan hna ṭha a thawk.

Zidane a lungngai lo

La Liga-ah Barcelona leh Atletico Madrid an awm avangin vawi khat lek tawlhthluk pawh a pawi a, Real erawh vawi thum lai chak tura ngaih an nihnaah an chak zo ta lo. Mahse, Real manager a nih hnua Champions League nomawi pahnih chawi tawhtu Zinedine Zidane erawh a lungngai lo.

French manager chuan, "Dinhmun chhe takah kan ding taah ka ngai hran lo. Point kan hloh ngei a, mah se kan hmabakah match tam tak a la awm a ni. Kan khelmuala match thum ṭha lo tak kan khelh avang maiin kan thawhrimna zawng zawng kha bawlhhlawh bawmah paih mai ka tum lo. He team enkawltu ka ni a, tuna kan mamawh chu hahdam taka awma kan hmabak match ngaihtuah hi a ni tih ka hria," a ti a, a tihturah a chian thu a sawi.