Juve leh Napoli an la chak vek
Serie A season kal laiah champion lai Juventus leh Napoli ten point an la hloh lo. Nilaini zan khan Italian club lian pahnih hian an league match ngana khelin hnehna an chang a, point 15 hmuin goal difference nei ṭha zawk Napoli chu hmahruaitu an ni.
Napoli-in khualmualah Lazio an lenchilh a, minute 29-naah Stefan de Vrij goal vangin mikhual team lamin si an phur. Napoli hian Kalidou Koulibaly, Jose Callejon, Dries Mertens leh Frello Filho te hmanga chhangletin 4-1 in hnehna an chang, an goal phurh an sutna goal pathum hi minute nga chhung lekin an khung thei.
Naples club-in Serie A nomawi an chawi hnuhnun ber aṭanga chutin kum 27 a liam tawh a, legend Diego Maradona-a'n hlawhtlinna a chanpui hnuah an la ropui leh lo - kuminah season bul an ṭan ṭhat avangin beisei an nei sang hle.
Champion lai Juventus pawhin goal khat faiin an mikhual Fiorentina an hneh hram, Turin club tana goal awmchhun khungtu hi Mario Mandzukic a ni.
Juve manager Massimiliano Allegri chuan, "Point thum hlu tak a ni, a lawmawm bikna chhan chu goal kan chhuah lo kha a ni bawk. Napoli pawh point hloh loin an kal zel a, team dang pawh an khel ṭha thei lo. Inelna nuam leh ngaihnawm kan hmachhawn chho zel dawn, tun ṭum atan chuan point thum hi a tawk," tiin a sawi.
Inkhel dangah Manchester City striker hlui Edin Dzeko goal hnih khung hmangin AS Roma chuan table mawngphah a awm Benevento chu 4-0 in an sawp. Champion tuma team indin thar mek AC Milan pawhin kai thar SPAL 2-0 in an hneh ve bawk.
Inkhel Results
Benevento 0 - 4 Roma
Atalanta 5 - 1 Crotone
Cagliari 0 - 1 Sassuolo
Genoa 1 - 1 Chievo
Hellas Verona 0 - 0 Sampdoria
Juventus 1 - 0 Fiorentina
Lazio 1 - 4 Napoli
Milan 2 - 0 SPAL
Udinese 2 - 3 Torino