Pathumnaah Ramhlun North hnehtu BVT
Mizoram Premier League Season 6-ah Bethlehem Vengthlang FC-in nimin tlai khan hun tawp dawna Vanlalzuia Hnamte free kick ropui tak hmangin Ramhlun North 2-1 in an hneh.
Chawngthansanga kaihhruai BVT hi match nga khelh zawhah point riat hmuin pathumnaah an awm.
Two - One
Minute 16-naah Ramhlun North defender Toky Zomuanpuia'n Bethlehem Vengthlang winger Laldinliana Varte a awm hnai tih hreball a pe let let a, keeper a thlan hmaa ball changtu Sihphir tlangval Dina Varte hian a insiamrem hnuah chiang zetin a volley goal.
Second half ṭan chiahah Ramhlun North captain C. Ramdinmawa'n box pawn aṭangin ṭha zet maiin crossbar a pet per a, hemi per hi Lalremruata'n si phurh sut nan a hmang.
Inkhela danglamna thlentu chu Vanlalzuia Hnamte a ni a, Chanmari West left back hlui hian box pawn ding lam aṭangin mawi zetin minute 85-naah a pet goal.
Ramhlun North-in 'golden chance' an neih chu goal thuntu Remruata'n ho tak maiin a tauh goal lo a, a tawpah an tuar ta a ni.
Foreigner naran?
Ramhlun North-in MPL ṭan hmain Harry Delona Morris Jr an lalut a, Liberian midfielder hian khelhna hmun chang pha mah se danglamna a thlen thei lo. Harry hi match hnuhnung pahnihah khel tluan loin thlak ve ve a ni.
Inkhel thlirna tawi
Team pahnih an inhnehtawk a, midfield-ah an ṭha ve ve a, an harsatna chu a hmawr bawktu an nei lo ve ve hi a ni. Goal innawr a na thei lo a, forward lamin defender-te an hneh lo ve ve a, inkhel pawh a hmuhnawm tawk lo.
Inkhel inhnehtawk taka team pahnih danglamna erawh freekick hi a ni mai a, a vannei zawk an chak - Ramhlun North hian freekick-ah Lalrinfela hmangin goal bar an pet per ve thung a ni.
A zawnin vawi 3
Ramhlun North-in an match hnung pathumah point an hmu lo a; Chanmari West, Chanmari leh Bethlehem Vengthlang an hneh lo vek.
Samson Ramengmawia hoten an player pawimawh striker Lalliansanga (Notea) leh midfielder V. Lalchhuanawma te inhliam an tuar tih a lang a, goal hmaah an vanduai ve bawk.
Goal khungtu Remruata'n dinglam aṭanga Rosangliana cross ṭha zet chu a tauh goal thei lo a, khung se chuan result a danglam thei ang.
Chawnga tel lohna
BVT coach Chawngthansanga chu Dinthar FC nena an inhnehtawk ṭuma a chet mawi loh avangin match hnih hrem a ni. Chawnga tel loin BVT-in Chhinga Veng an hneh lo a, Ramhlun North lakah erawh hnehna an chang. BVT boss Chawnga hi September 29 zana Chanmari FC an hmachhawn hunah technical area-ah a ṭhu leh thei tawh ang.
ZoFooty Statistics
Bethlehem VT 2 - 1 Ramhlun North
BVT : Laldinliana Varte 16'; Vanlalzuia Hnamte 85'
MPFC : Lalremruata 46'
MoM : PC Laldinpuia, BVT
44% Ball Possession 56%
10(7) Shots (On Target) 15 (6)
2 Yellow Card(s) 0
0 Red Card(s) 0
Powered by Rainbow Multibrand Mobile Showroom
# Team Pld W D L GF GA GD Pts
1 Chhinga Veng 4 3 1 0 11 3 8 10
2 Chanmari FC 4 3 1 0 8 2 6 10
3 Bethlehem VT 5 2 2 1 7 7 0 8
4 Chanmari West 5 2 1 2 5 7 -2 7
5 Aizawl FC 5 1 3 1 10 6 4 6
6 Dinthar FC 5 1 2 2 7 8 -1 5
7 Ramhlun North 5 1 1 3 5 8 -2 4
8 Mizoram Police 5 0 1 4 6 18 -12 1