Costa manah Chelsea leh Atletico an inrem

Chelsea chuan ma­nager Antonio Conte-a'n a mamawh tawh loh thu a hrilh Diego Costa chu Atletico Madrid lamah a kal an remti a, Spain international striker mana an inremna zat hi tarlan ni chiah lo mah se pound maktaduai 57.5 bawr vel niin khawthlang media te chuan an tarlang.

Player lalut thei loa hrem an nih mek avangin January-ah Costa hian Atletico hi a zawm dawn chauh a, a hlawh tur chungchang leh contract rei zawng turah inremna erawh a la awm rih lo. Atletico chuan an player hlui an laklet tur hian rei loteah medical a neih tur thu an sawi bawk.

September 27 zana Champions League-a Atletico Madrid-in Chelsea an mikhual hunah Diego Costa hi an tlangzarh dawn nia sawi a ni. Brazil a piang leh seilian, Spain khua leh tui nihna neitu Costa hian season hmasa Premier League nomawi an chawi nan league-ah goal 20 ngawt a khung.

Mahse, kumin kumtira Leicester hmachhawn tura an inbuatsaih laiin Costa hi an fitness coach nen an inhmu thiam lo a, heta ṭang hian Chelsea-ah a tla tlum lo ṭan. Hemi hnu lawkah hian China lam aṭangin kum khatah pound maktaduai 30 hlawh tura sawmna a hmu nia sawi a ni a, mah se hetihlai hian Chelsea chuan an player hi zawrh lai a nih loh thu an sawi.

Nipui transfer a in­hawng a, Conte-a'n thlasik transfer-a chhuahtir a phal loh striker hi text message hmangin a mamawh tawh loh thu a hrilh. Hemi hnu lawkah hian Spain striker hian Atletico-a kir a duh thu a sawi a, Chelsea chuan uchuak taka a man zat tur phutin misual ang maia an enkawl thu a sawi - tunah chuan engkim chinfel a ni a, Costa-a'n Atletico a pan dawn ta.

Costa Number
£32m - Chelsea-in July 2014-a Costa lakluh nan Atletico chu heti zat sum hi an pe.
120 - Blues tana inlan zat, heng zinga 109-ah bul a ṭan.
59 - Chelsea tana goal khung zat.
52 - Premier League-ah match 89 khelin goal 52 a khung.
20 - Premier League-a season khata goal a khung hnem ber ṭuma a khung zat (2014-15 & 2016-17).
2 - Blues tan Champions League-ah match 15 khelin goal hnih a khung.
31 - yellow card hmuh zat.
1 - red card.
12 - hrem vanga a match khelh theih loh zat.
3 - Chelsea manager-a hrawn zat (Jose Mourinho, Guus Hiddink, Antonio Conte).
3 - Nomawi liantham a chawi zat (Premier League 2014-15, 2016-17; League Cup 2014-15).