Subroto Cup Semifinal-ah Mizoram

Nimin tlai khan Subroto Park, Delhi-ah Subroto Cup Boys U17 quarter final khelh a ni a, Mizoram chuan penalty shootout-ah Meghalya 5-4 a hnehin semi final an lut.

Vawiin hian semi final an khel nghal dawn a, Afghanistan lam team leh Army Boys inkhela chak zawk nen an inkhel ang.

Sikul naupangte tana inelna ngaihhlut takah hian Mizoram tan hian PC Ruatpuia, Lalrempuia leh Rintluanga ten goal an khung a, first half-ah 2-0 in hma an hruai a, ngaih a ṭha.

Mizoram player Lalramnghaka chu minute 64-naah hnawhchhuah a ni a, inkhel a danglam ta daih mai - hun tawp dawnah Meghalya lam hian an si phurh an zut zo - hun pangngaiah 3-3 niin extra time khelh a nih hnuah goal dang a luh tawh loh avangin penalty shootout hmanga chak zawk zawn a ni.

Mizoram hian an match hmasa lamah Nepal (3-0), Assam (2-0), Gujarat (4-0) te an hneh thei a; group match hnuhnung berah Indonesia 1-2 in hneh lo mah se point hmuh zat inangah goal difference nei ṭha zawk an nih avangin Mizoram hian knock out round hi an lut a ni.