Lalhlima'n Chanmari West a chhan

Aizawl West derby-ah chak zawk an awm lo. Dinthar FC-in Lalnunpuia hmanga hma an hruai hnuah captain Malsawma Chhangte-in penalty a hlah a, injury time-ah H. Lalhlimpuia hmangin Chanmari West-in an sut.

Lammualah hun tawp ham rik hmaa zai rual Dinthar mipui thawm an reh a, Chanmari West zai thawm hriat tur a awm thung.

Ningani zan inkhelah hun tawp thlenga ṭankawh a pawimawh zia a lang. West Warrior-in point khat an sual chhuah avangin match nga khelh zawhah semifinal khel thei chinah an inhlangkai a, Dinthar FC erawh parukna an ni thung.

Goal khungtu Nunpuia

First half-ah inkhel hmuh­nawm en tur a awm lo a, inkhel a nung tawk lo. West Warrior cap­tain Lalnunmawia goal hmaah a la hriam tawk lo zel a, Dinthar bang an su tlang thei lo.

Minute 39-naah Nunpuia'n Dinthar goal hmahruai a khung a, Champhai tlangval hian dinglam aṭanga David Lalrinchhana cross chu a tauh goal chiang hle.

A tawpah West Warrior

Second half-ah erawh inkhel hmuhnawm chhawp chhuah a ni a, inkhel boruak a san avangin referee pawhin hna a ngah hle. Dinthar forward Jackson Victor-a'n Mizoram Police an hmachhawn ṭum angin khel ṭha tawk lo mah se West Warrior defender tan a la hnawksak pha tho.

Minute 78-naah Nigerian forward Jackson hian penalty a hlawh chhuak a, Bethlehem Veng­thlang FC an hmachhawn ṭuma penalty khungtu Malsawma Chhangte a pen chhuak. Dinthar FC captain Malsawma hian keeper vei lam kilah petin West Warrior keeper Lalmalsawma'n a dang hman.

Maimawms-in penalty an hlah hnuah penalty shout nei nawn mah se pek nawn an ni tawh lo a, coach HC Zarzoliana kaihhruai West Warrior an beidawng duh lo.

Injury minute li tawp hma hretin Chanmari West-in halfway line pelh hret aṭangin freekick an hmu a, ball pet thiam Jacob Lal­rawng­bawla'n vawrh lutin Lalhlima'n a tauh goal.

Chanmari West mipui thawm a ring a, Dinthar an ngui. Lam­mualah football ropuina lantirin a awm a, kar leha inkhel boruak a nung sawt dawn.

Dinthar FC hian September 28 tlai hian Aizawl FC an hmachhawn dawn a, he mi zan hian West Warrior-in table mawnga awm Mizoram Police an hmachhawn thung ang.