Spanish La Liga Real tan tawlhthluk a thiang tawh lo
Zanin dar 7:45-ah Real Madrid-in La Liga match khel turin Alaves an lenchilh dawn a, Zinedine Zidane-a naute hian point sarih ngawta hmahruaitu Barcelona an phak tawh loh avangin champion an tum chuan an tan tawlhthluk nawn a thiang tawh lo.
Vawiin tlai dar 4:30-ah Atletico Madrid an inlan dawn bawk a, an mikhual tur hi Sevilla an nih avangin awlsam taka chak tura beisei chi an ni lo. Zanin dar 12:15-ah Barcelona-in Girona an lenchilh ang a, La Liga kaithar club lakah Catalan club hi an tlangnel nghal tura ngaih a ni.
Zidane hmaah a fapa
Zanina Real Madrid-in Alaves an hmachhawn hunah thil danglam a thleng dawn - Zinedine Zidane-a'n a hmingṭhatna chhawm nung turin Alaves hneh ngei a tum ang a, Alaves jersey ha chungin a fapa Enzo Zidane a inlan thung dawn! Enzo hian kum riat mi lek a nih laiin Real a zawm a, nipui transfer lai khan khelh tam theihna hmun zawngin Alaves hi a pan.
Kum 22 mi midfielder chuan, "Ka tan chuan game danglam tak a ni dawn. Ka pa hi ka entawn ṭhin a ni a, footballer ropui tak, a thiltih apiang uluk taka ka lo zir ṭhin a ni. Real Madrid-ah nuam ti takin awm mah ila, chona thar hmachhawn turin ka chhuak a, min duh em em tu club ka pan thei hi ka vannei a ni," tiin Alaves-a a hlim thu a sawi lang bawk.
Insiamṭhat hun
Real Madrid-in league match nga an khelh tawhah vawi hnih hnehna changin vawi hnih an khingpui an inhnehtawkpui a, vawi hnih an tlawm - an match hnuhnung berah Real Betis chu 1-0 in an ngam lo a, insiamṭhat an tum a, champion nawn an tum a nih chuan zanin hi insiam-
ṭhat hun a ni.
League match li chhung an chet chhiat laiin Cristiano Ronaldo awm lo chu Real ṭantu ten chhuanlamah an hmang a, mah se Portuguese forward hoin Real Betis lakah goal an khung thei lo. Zaninah kum 32 mi forward chungah mipui mit a fu dawn a, a team hi hnehna a chanpui thei a nih chuan fak rawn a hlawh ang a, an chak zo lo a nih chuan kawh rawn tur pawh amah bawk a ni.
Ropui ber Messi?
Real Madrid-in league match nga an khelh tawha goal an khung zat chu goal kua a ni a, heti zat tho match a inlan tawha Lionel Messi goal khung zat chu goal kua tho a ni - Real squad pumpui goal khung zat leh Messi goal khung zat a in ang! Zaninah pawh Messi bawk hi Girona tan buaipui tur a ni dawn a, a harsa dawn.
Hei mai hi a ni lo. Neymar tel loa talbuai tura an ngaih team hian match ngaa chak vek chungin player pakhat hralh vanga an buai loh zia an pholang mek a, Argentine legend Juan Roman Riquelme-a'n 'The black Lampard' tih hiala a koh Paulinho chuan a theihna a pholang mek bawk - kum 29 mi midfielder hian league match li a khelhah goal hnih a khung tawh a, ngaihthah a thiang lo.
Hei le Atletico
Atletico Madrid-in an league match hmasa berah kai thar Girona chu 2-2 in inhnehtawkpui mah se an insiamṭha thuai a, league match nga an khelh tawhah vawi thum hnehna changin Girona hnuah vawi khat chiah chak zawh loh an nei - table-ah pathumna dinhmun an luah mek.
Diego Simeone-a nauten an lenchilh tur Sevilla hi pahnihna dinhmun luah mektu an ni a, league match ngaah vawi li chakin vawi khat chiah an khingpui an inhnehtawkpui. Team pahnih inthlauhna hi point hnih a ni a, Atletico tan Sevilla tlanpelhna remchang a ni.