Cavani leh Neymar inkar buaina a fel? PSG tana penalty pet tur chu Cavani

Paris Saint-Germain manager Unai Emery chuan a player langsar pahnih zingah penalty pet tur zawk a thlang fel. Emery chuan,"Penalty pet tura rawn ding chhuak hmasa tur chu Cavani a ni, a dawtah Neymar," tiin a sawi.

French Ligue 1 club hausa hian an match hnuhnung berah Lyon 2-0 in an hneh a, an chakna goal pahnih hi own goal a ni. Lyon an hneh ṭum hian Cavani leh Neymar ten freekick leh penalty pet an duh ve ve a, khelmual chhunga thil thleng bakah hian dressing room lamah pawh boruak a chhe zui nia sawi a ni.

Spanish manager Emery hian Lyon nena an inkhelh zawh hnu hian an pahnih inkarah penalty pet tur an sawifel loh chuan amah ngeiin a sawifel tur thu a sawi a, "Hetiang thil hi kan tan buaina a nih ka duh lo," tiin team boruak ṭha neih a duh thu a sawi tawh.

South American player pahnihte hian tunkar chhungin training an nei dun a, Nilaini khan Neymar hian a chet dan avangin ngaihdam a dil niin French chanchinbute chuan an tarlang. Cavani ball ken lai chhuhsaka Neymar petu Dani Alves pawhin boruak ṭha siam tuin zanriah a ei dun pui niin an sawi bawk.

Zlatan Ibrahimovic a chhuah hnuah Uruguay inter­national Cavani hi PSG hmatawng langsar a ni a, season hmasa khan inelna hrang hrangah match 48 khelin goal 47 zet a khung - season kal laiah hian match riat aṭangin goal kua a khung leh tawh bawk. PSG tana season ngana hmang mektu Cavani hi tunlai khawvelah striker hriam ber pakhat a ni - penalty pet tur zawka a inngai pawh kha a mak lo.

Nipui transfer laiin PSG hian Barcelona aṭangin pound maktaduai 200 zet sengin Neymar an lalut. Brazil captain hi an ram team-ah chuan hotupa a ni a, a duh danin a khel thei. Catalan club-ah erawh khawihchet thiang lo Lionel Messi a awm a, goal khung kawngah Luis Suarez a tluk lo bawk.

Kum 25 mi Neymar hian hlawhtlinna dang dawn duhin Paris a pan a, Ligue 1 club a zawm chhan hi sum vang niin a lang bawk. A chhuah chhan chiang tak pakhat erawh club chhunga thu ber nih a duh vang a ni pakhat, manager Emery tan player lian pahnih hi enkawl thiam a ngai khawp ang.

PSG hian season kal laiah hneh loh an la tawng lo a, league match 6 aṭanga point 18 hmuin table hmahruaitu an ni, zanin dar 8:30-ah Montpellier an lenchilh ang.