Dybala lungawina a pawimawh - Marotta

Juventus general mana­ger Giuseppe Ma­rot­ta chuan an player ṭhang­duang Paulo Dybala chu Turin club tana khel reng turin a duh a, an forward hi chelh tur chuan tih lung­awi a ngaih thu a sawi.

Argentina interna­tional Dybala hian sea­son duhawm a hmang mek a, Serie A match nga khelhah goal riat a khung der tawh. Spanish club lian Real Madrid leh Barcelona chuan an club thuam chak turin an ngaihven hle nia sawi a awm leh der tawh.

Marotta chuan, "Kan player duhlai hian chhuah a duh a nih chuan dan theih a ni lo ang, kan hnena a cham reng theih nan chuan nomawi chawi chung ngeia kan tih lungawi a ṭul. Tun dinhmunah chuan he hmunah hian a hlim a, club dang lakah angaihtuahna a hmang lo," tiin a sawi.

Juventus general ma­nager hian sawi zawmin, "Spain-ah chuan player-in contract an ziahin club dang tana lei chhuah theihna tur zat an ziak ṭhin a, Italy-ah erawh Gonzalo Higuain leh Miralem Pjanic te chiah lei chhuah theihna tur zat ziak tel an awm thung," tiin release clause chungchang a sawi.

Italy champion Ju­ventus leh Napoli ten season kal laiah hneh loh an la tawng lo a, champion tuma inum boruak a sang chho dawn. Juventus hian zanin dar 12:15 hian Torino an mikhual ang.