Manchester United chungah City
Manchester City-in an hmelma Manchester United aia an khingpui hneh chiangin Premier League hmahruaitu nihna an hauh, point hmuh zat inangah Pep Guardiola hote hi Jose Mourinho naute aiin goal difference-ah an ṭha zawk.
Inrinni zanah City-in an mikhual Crystal Palace chu Raheem Sterling-a goal hnih baka Leroy Sane, Sergio Aguero leh substitute Fabian Delph hmangin 5-0 in an sawp. United-in St Mary's Stadium-ah Romelu Lukaku hmanga hma an hruai hnuah Jose Mourinho thiam dan tak defensive game khelin point khat an hlawh chhuak ve bawk.
City ṭha zawk
Manchester City-in tun season-a point la hmu lo Crystal Palace lakah minute 44-naah chauh Sane hmangin goal khung mah se hemi hmaa chance ṭhahnem tak an neih avangin minute 90 chhungin an vanduai reng theih a rinawm loh.
Goal hmangin City-in an thiam zia an pholang a, Palace erawh coach thar Roy Hodgson hnuaiah league match hnih a zawnin an chak lo. Eagles hian champion rinkai pahnih United leh Chelsea te an hmachhawn zui dawn avangin Hodgson tan Dutch manager Frank de Boer hnuaia league match vawi li chak lo zawn record chu tlukpui a har lo ang.
Sum hmang tam City manager Pep Guardiola erawh an khelh danah a lawm. Spanish manager chuan, "Season liam ta ai khan point khatin kan hmu tlem a, mah se goal kan khung tam bakah goal kan chhuah tlem a, tuna kan dinhmun hi kum khat liam ta ai khan ka lawm zawk. Amaherawhchu September chauh kan la thleng," tiin a sawi.
City hian league match hnuhnung pathumah goal nga an khung tling vek a, Blackburn-in 1958-59 season-a hetiang record an neih tawh chu an tluk pha chiah a ni. Pep-a hote hian Thawhlehni zana Shakhtar Donetsk nen Champions League match an khelh hnuah September 30 zanah champion lai Chelsea an hmachhawn ang.
Chakpui tham Lukaku
Manchester United striker Lukaku-a'n season ṭan hmaa amah sawiseltute chu goal hmangin a chhanglet zel a, St Mary's Stadium-ah Ashley Young-a cross ball a tauh chu Saints goalkeeper Fraser Forster-a'n dang mah se a per chu Belgian striker hian a pet goal chiang hle.
Khualmuala khel United hun tawp lamah an talbuai a, Jose Mourinho-a'n player pathum a thlak pawh goal venhim nan vek a hmang. Spanish midfielder Juan Mata aiah tlarhnung veng thiam zawk Ander Herrera a luh bakah defender pahnih Chris Smalling leh Daley Blind te'n attacking player an thlak ve ve bawk.
Saints midfielder Oriol Romeu tauh goal tur chu United midfielder Marouane Fellaini-a'n a tauh chhuak hman a, hun tawp lamah referee Craig Pawson-a'n United boss Jose Mourinho a hnawh chhuak bawk.
Inkhelh banah Mourinho chuan, "Min hnawhchhuah chhan ka hre lo a, in hriat duh chuan referee zawt ta che u," tiin a chhang. Portuguese manager chuan goal khungtu Lukaku fakin, "Goal a khung hi chu ka ring sa a, Everton leh West Brom tana a khelh lai aia tam kan tana a khung hi ka beisei dan a sa a ni. Match apianga a khung erawh ka ring bik lo a, kan tan chuan player pawimawh a ni," a ti.
Belgian striker Lukaku hian United tan inelna hrang hrangah goal riat a khung tawh a, Leicester City nen an inkhelh ṭuma a goal a khung lo tih loh chu tun season-ah club leh ram tan a la pet goal vek.