Zaninah Arsenal vs West Brom

Arsenal chuan zanin dar 12:30 hian Premier League match khel turin Emirates Stadium-ah West Brom an mikhual dawn. Nipui transfer laia player sawi hlawh Alexis Sanchez chuan bul a ṭan thei tura beisei a ni.

West Brom hian Emi­rates Stadium-ah hian league match bikah result ṭha an nei ngai meuh lo, vawi ruk an lenluhah an tlawm vek a, goal khat chiah khungin goal 13 an chhuah thung - zaninah hian West Brom defender Kieran Gibbs chuan a vawi khat nan a club hlui a hmachhawn ang.

Season bul ṭan fuh lo Gunners hian an match hnuhnung zawkah hliam vangin Mesut Ozil an chhawr thei lo, Germany international hian training a zawm leh tawh. Chelsea nen an inhnehtawk ṭuma hliam tuar striker Danny Wel­beck erawh a malpui na vang­in a la khel thei dawn lo.

England international Welbeck a awm lo mah se Alexandre Lacazette leh Olivier Giroud te an la awm a, Barcelona forward hlui Sanchez a inpeih leh tawh bawk. Wenger-a'n Europa League leh League Cup-ah Chile international Sanchez hi a chhawr a, league-ah erawh bul a la ṭantir lo.

Gunners manager Wenger chuan, "Sanchez chungchangah hian rilru danglam ka nei lo. Player dang aiin chawlh a nei rei bik a, chuvangin ngai awh leh tur chuan hun a mamawh a ni, chu bakah league bakah Europa League leh League Cup te kan ngai pawimawh tihna a ni bawk," tiin Sanchez chungchang a sawi.