Mizoram zinkawng a tawp
Subroto Cup Boys U17 semifinal-ah Mizoram hminga khel Govt. Bazar High School, Lunglei chu Army Boys lakah 1-3 in an chak lo a, final lut zo loin an zin kawng a tawp. Army Boys hian final-ah Tripura hnehtu Jharkhand an hmachhawn leh ang.
Nimin tlaia Ambedkar Stadium, Delhi-a inkhelah Mizoram lam hian minute 13-na lekah goal khungin final luh beiseina nei mah se an goal an venghim zui thei lo, ho takin goal hnih an chhuah,. Tharuma chak lo zawk Mizo rawltharte hian chawlhlawk hmain goal thum an chhuah hman a, second half-ah goal a lut tawh lo.
Subroto Cup hi India ram pum huap school inelna niin kum 1960 aṭang khan kum tin neih ṭhin a ni a, nikum khan semifinal-ah Brazil club Atletico Paranaense hneh loin an tla tawh a, kumina an hneh loh hi nikum finalist an ni.
Tun ṭum inelnaah hian coach Lalmuankima kaihhruai Mizoram team hi group F-ah awmin, an group match hmasa lamah Nepal (3-0), Assam (2-0) leh Gujarat (4-0) te hnehin Indonesia erawh 1-2 in an ngam lo. Quarterfinal-ah Meghalaya nen hun pangngaiah 3-3 a an inhnehtawk hnuin penalty shootout-ah 5-4 in an chak.
Knockout stage chinah Mizoramin goal an khung hmasa ve ve a, amaherawhchu an tlarhnung pawp vangin Meghalaya lakah penalty shootout hial pet a ngaih phah a, semifinal-ah pawh tlarhnung ṭha tawk lo chu an chak lohna chhan a ni.
Nimin tlai semifinal inkhel hmasa zawkah Jharkhand chuan Tripura lakah goal khat an phurh zet hnuah 3-1 a hnehna chang letin final an lut. Jharkhand hian chawlhlawk hmain an si phurh an sut a, an goal hnuhnung pahnih hi second half minute hnih chhung leka an khung a ni.