Chelsea striker number 1 Morata

Alvaro Morata-a'n Premier League champion lai Chelsea striker number 1 a nih zia nemngheh nan Inrinni zan khan Stoke City khelmaulah hat trick a siam. Blues hian Bet365 Stadium-ah 4-0 a hnehna changin Morata bakah Barcelona player hlui Pedro chuan goal khat a thawh ve bawk.

Antonio Conte-a'n Nilaini zan Champions League-a Atletico Madrid an lenchilh tur hre lawk ran chungin Cesc Fabregas leh Gary Cahill te bench-ah a ṭhuttir a, hliam dam hlim Eden Hazard chu inkhel bul a la ṭantir lo bawk. Belgium international hian tun season league match bikah inkhel bul a la ṭan lo.

Diego Costa-a'n a club hlui Atetico Madrid a zawm leh karah a aiawh tura lak Morata chu khelmual chhunga player langsar ber a ni. Spain international hian minute 2-na lekah Cesar Azpilicueta long ball pet chu mawi zet a la thlain Stoke goalkeeper Jack Butland dan hman lohin a khung.

Real Madrid striker hlui hian tharum a ngah tawk tih lantir nan halfway line aṭanga ball a tlanpui hnuah angle zim deuh aṭangin a khung a, goal thumna khung tur erawhin hna harsa a awm lo - six yard box chhungah Azpilicueta siamsak bawk a khung.

Pound maktaduai 60 man Morata hian Chelsea tan league match ruk khelhah goal ruk a khung a, assist vawi hnih a nei tawh bawk. Blues manager Conte chuan a striker chungchang sawiin, "A khel ṭha a, nidang zawng aiin a ṭha zual zawk a ni. Striker ṭha ber ni turin a khelh zui zel ka beisei," tiin a sawi.

Chelsea player zingah kum 24 mi Morata hi Premier League-a hat trick siam thei 17-na a ni a, English club inelna league sang berah hian, player mal hattrick siam thei neih tam lamah Blues-in an tluk loh chu Arsenal (19) chiah an ni.

Italian manager Conte chuan sawi zawmin, "Stoke hi team ṭha an ni a, an khelmualah phei chuan point hmuh a harsa hle. Tun ṭumah bik kha chuan kan khel ṭha zawk a, bul kan ṭan ṭhat kha kan chhawr hle. Chutihrualin awlsam leh nuamsa taka hnehna chang kan ni bik lo," tiin a sawi.