Chanmari Chungah Chhinga Veng

Mizoram Premier League Season 6-ah Chhinga Veng chuan anmahni hnaih bertu Chanmari FC hnehin table chung berah an dinhmun an sawh nghet.

Zirtawpni zan inkhel­ah Kel­kang tlangval Khawpui­mawia'n Chhinga Veng chakna leh goal awm chhun a khung. Chhingcows-in MPL6-ah hneh loh an la tawng lo a, match nga khelh zawhah point 13 an hlawh chhuak.

Chhuanlam a awm

Tun season-ah Chanmari FC leh Chhinga Veng FC vawi thum an intum tawh - H Vanlalthlanga enkawl team hi Lalsangzuala Hmar enkawl team-in vawi thum a zawnin an hneh ta!

MPL bika an chak lohnaah hian Chanmari tan chhuanlam tur a awm. Inkhel tur team sheet thehluh vek tawh hnuah training-naah tawnhriat nei ṭha Joseph Lal­nunpuia a inhliam a, hei vang hian tlarhnung rem ṭhat a ṭul phah.

A nung nghal

Hmahruaitu inchuhna inkhel boruak a nung nghal a, Chanmari FC-in an nawr nghal. Chhinga Veng lamin match khat an hahdamtir hnuah Malsawmfela an luhtir a, Ramhlun South tlangval hi Chanmari FC tan buaina tham a tling ve bawk.

Chanmari FC winger Vanlal­biaa Chhangte-in a ball control ṭhat avangin chance ṭha bik a insiam a, amaherawhchu a ball khawih vawi hnihna fuh tawk loh avangin keeper Zothanmawia'n a dan sak.

Squad chhah a lang

Chawhlawk zawhah Chhinga Veng an che ṭha ṭan a, minute 51-naah Sawmfela'n Chanmari tlarhnung tawn tlangin crossbar a pet per a, minute nga hnuah Chhingcows boss Sanga'n Kel­kang tlangval Mapuia a luhtir zui.

MPL6-a goal khung tam ber Sawmfela'n a ṭhiante a pe thiam tih lantirin minute 59-naah ball fing a pe lut a, Chanmari defender Joe Zoherliana leh C. Lal­rosanga ten tha thar nena tlan Mapuia um pha loin ani hian keeper F. Lalmuanawma dan hman loin a pet goal.

Chhingcows midfield-ah Lal­rin­chhana a tlan tam a, Elec­tric tlangval khelh ṭhat zanah Chanmari FC midfield-in awmze neiin an khel thei lo. Tlar hma lamah Sawmfela a tal nat avangin Chanmari tlarhnung hun tawp lamah a nghing nasa bawk.

Chanmari FC-in siphurh sut tumin winger tlan chak Lal­muanzova dah lut mah se goal hmuh tur a awm lo a, Liberian striker Alex Whittemore pawha che thei lo - Chhinga Vengin 1-0 in hnehna an chang.

Record thar?

Chhinga Veng hian coach Sanga hnuaiah hneh loh an la tawng lo a, competitive match 17 chhung an kaltluang tawh.

Veteran coach Thlanga'n Chan­mari FC a enkawl hmasak zawk ṭumin match 21 chhung hneh loh an nei lo a, Chhingcows hian he record duhawm tak hi khum thei dinhmunah an ding mek.

Chhinga Veng hian Sep­tember 29-ah Ramhlun North an tum ang a, hei bakah hian an hmaa ding leh tur Dinthar FC, Chanmari FC, Chanmari West leh Dinthar FC te laka an tlawm loh chuan Thlanga hoa Chanmari FC record hi an khum ang - mimal inbeihnaah bik Sanga a chungnung mek.